भांगरभूंय | प्रतिनिधी
अक्षता शब्दाचो अर्थ म्हळ्यार साकल्प (पुराय), क्षत ज्या वस्तीक बुराक ना, अखंडीत वस्त. खंडीत वस्त पुजेंत वापरल्यार वायट शक्तीचो प्रभाव जावं येता अशें मानतात.
हिंदू संस्कृतींत जायत्या गजालींक म्हत्व आसा, आनी तातूंतली एक गजाल म्हळ्यार तांदूळ. दर एका धर्मीक कार्याक तांदळाच्या रुपांतल्यो अक्षता जायच पडटात. सगल्या धर्मीक विधिंची प्रतिनिधित्व अक्षता रुपी तांदूळ करता. लग्न जावं मुंज जावं, पुजा सगल्याकूच अक्षता लागतातच. पुजेंत हेर कसलीय गजाल नाजाल्यार जाता, पूण अक्षता नासतना मात जायना. लग्न सुवाळ्यांत तांदूळ रुपी अक्षता खूब म्हत्वाच्यो आसता.
कृशी प्राधान्य देश जाल्ल्यान शेतांनी पिकिल्लें धान्य म्हणजेंच शेतकारांची लक्ष्मी. हे तांदूळ म्हणजे सुपीकपणाचें प्रतीक. सुपीकपणाचें प्रतीक आशिल्ले तांदूळ लग्नाच्या प्रत्येक विधिंनी वापरतात. लग्नाच्यो पत्रिका सोयऱ्या दायऱ्यांक दिताना व्होंवळीक पत्रिकेक हळद पिंजर लावन भितर हळद पिंजर लायिल्ल्यो अक्षता घालून दितात. लग्नांत जावपी व्हंकलेचे वटेन व्हंकलेचो मामा, न्हवऱ्याचे वटेन न्हवऱ्याचो मामा मंगलअश्टकांचो घोश चालू आसता तेन्ना एक सारके येरवाण्यांत आशिल्ले तांदूळ न्हवरो आनी व्हंकलेचे ताळयेचेर घालीत रावतात.
न्हवरो- व्हंकलेन एकामेकांक माळ घालतकच शुभमंगल सावधानाचो घोश जातकच सव्यार जमिल्ले लोक अक्षता तांचे ताळयेर घालून व्हंकलेक आनी न्हवऱ्याक एश्वर्य प्राप्ती, संपत्ती प्राप्ती आनी संतती प्राप्तीचो आशिर्वाद दितात. हो सगलो विधी चलतना सभाघरांत जमिल्ल्या लोकांकय अक्षता वांटिल्ल्यो आसतात. व्हंकल- न्हवरो ह्या लोकांचो आशिर्वाद घेवपाक वतना लोक न्हवरो आनी व्हंकलेचेर अक्षता घालून आशिर्वाद दितात. ह्या सगल्या सुवाळ्याक अक्षता रोपण म्हणटात.
लग्नाक ह्यो अक्षता करपाक अखंड तांदळांक तेल पोशेवन हळद कुकूम लावन (आतां तरे तरेचे रंग लायतात) सावळेंत सुकयतात. सगल्या धान्या भितर तांदूळ हें अशा प्रकारचें धान्य जाका केन्नाच कीड लागना. तांदळा इतलें शुध्द धान्य ना. बायलेच्या चारित्र्याक धुल्ल्या तांदळाची सर दितात. तांदूळ एकदल धान्य. तांदळाचे दोन भाग जायनात. संवसारांत भितर सरलीं म्हणटकच तांदळा भाशेन एकदल रावपाक जाय म्हण.
शेत लायतना तांदूळ एका जाग्यार किल्लून काडटात, आनी दुसऱ्या जाग्यार व्हरून लायतात तेन्ना तें बरे तरेन जाता. लग्न जावचे पयलीं चली भुरगें आपल्या आवय-बापायच्या घरांत वाडटा आनी लग्न जातकच तें एकदम नव्या घरांत पावता. दुसऱ्या घरांत आपलीं पाळां मुळां घट करता. त्या घरांत एक रूप जाता. तांदळांचे बाबतींत तशेंच जाता. तांदूळ सुपिकतेचें प्रतीक मानतात. तांदूळ एक तरेचें बीज एका बिजा पसून कितलेशेच आनीक कण तयार जातात. तशेंच व्हंकल- न्हऱ्याक वंशवृध्दिचो आशिर्वाद मेळपाक अक्षता घघलून आशिर्वाद दितात.
भलायकेचे नदरेंतल्यान हळद आनी पिंजरीन भरशिल्ले तांदूळ रुपी अक्षता फायदेशीर आसता आनी सकारात्मक उर्जा दिता. एक कार्य संपन्न जालें म्हूण मनाक एक शांती मेळटा.
श्रीदेव सत्यनारायाणाचे पुजेंत आनी महादेवाक धव्यो अक्षता वापरून ताची पुजा करतात. श्रीदेव गणपती आनी हेर देवींक हळद पिंजरीन भरशिल्ल्यो अक्षता वापरतात.
आरत जावं दिव्या पोंदा अक्षता घालून दवरल्यार दिव्याचें चैतन्य वाडटा आनी दिव्याची सक्त तिगून उरता. फुलांच्या जाग्यार अक्षता वापरपाक शास्त्र परवानगी दिता.
प्रिता परब
9921382375
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
