भांगरभूंय | प्रतिनिधी
पणजी: गोंय पुलिसांनी गोंयांत 2024 वर्सा 4,10,125 वाहन चालकांनी येरादारी नेमांचें उल्लंघन केल्ल्यान 24 कोटी 74 लाख 42 हजार 400 रुपया दंड वसूल केलाे. ताका लागून गोंयांत सरासरी दिसाक 1,120 जाणां कडल्यान 6 लाख 76 हजार 73 रुपया दंड वसूल केलो. तशेंच 2023 वर्साचे तुळेन अंदूं 18.30 टक्के कारवायेंत जाल्यार 15.34 टक्के दंडांत उणाव जालो. हाचे बगर सगल्यांत चड हॅल्मॅट घालूंक नाशिल्ल्यान 39,781 जाणां कडल्यान 3 कोटी 95 लाख 57 हजार रुपया दंड वसूल केला. 5,367 सोरो पियेल्ल्या चालकांचेर कारवाय केली. जाल्यार फक्त 32 नेण्ट्यां भुरग्यांनी वाहन चलयिल्ले खातीर 30 हजार रुपयांचो दंड वसूल केलो.
गोंयांत अपघातांत मरण येवपाचें प्रमाण वाडत आशिल्ल्यान येरादारी नेमांचें उल्लंघन करप्यांचेर व्हड प्रमाणांत विशेश मोहिमे खाला कारवाय करतात. हातूंत मुखेलपणान सोरो पियेल्ले चालक, गतीन वाहन चलोवप, वाहन चलयतना मोबायलाचो वापर करप, सीट बेल्ट न घालप, वाहनांक काळे हारशे बसोवप, हॅल्मॅट न घालप अशा प्रकारांचो आस्पाव आसा.
अशें आसून लेगीत गोंयांत वाहन अपघात आनी मरणाचें प्रमाण मात उणें जायत नाशिल्ल्याचें मुखार आयलां. हाचे बगर वाहन चालक सर्रास येरादारी नेमांचें उल्लंघन करीत आशिल्ल्याचें मुखार येत आसा.
2024 वर्सा येरादारी नेमांचें उल्लंघन केल्ल्यान 4,10,125 वाहन चालकां कडल्यान 24 कोटी 74 लाख 42 हजार 400 रुपया दंड वसूल केला. जाल्यार 2023 वर्सा 5,02,020 जाणां कडल्यान 29 कोटी 22 लाख 98 हजार 600 रुपया दंड वसूल केला. हाका लागून 2023 वर्साचे तुळेन अंदूंचे कारवायेंत 18.30 टक्के जाल्यार 15.34 टक्के दंडात उणाव जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
