शिवरायांचे कामगिरीचो संवसारांत गाजोवाजो

भांगरभूंय | प्रतिनिधी

सुभाष फळदेसायः मडगांवां शिवजयंती उमेदीन, मिरवणुकेचें आयोजन

भांगरभूंय । प्रतिनिधी

मडगांव : शिवजयंती निमतान गोंयभरांत विवीध कार्यावळी जातात. देशांत हिंदवी स्वराज्याची स्थापना केल्ल्या महाराजांनी शासन, प्रशासन, सुशासन आनी रणनिती शिकयल्या. शिवरायांचे कामगिरीचो संवसारांत गाजोवाजो आसा. मुघल, निजाम आनी आदिलशाही आड छत्रपती शिवाजी महाराजांनी लडो दिला. गोंयच्या आनी हिंदू धर्माच्या रक्षणा खातीर तांचो आशिर्वाद लाबला आसुंये. गोंयचे भुंयेक छत्रपती शिवरायांचे पांय लागल्यात. पुर्तुगेजांचे तावडेंतल्यान आनी बाटाबाटींतल्यान गोंयच्या लोकांची सुटका केली. धर्मांतरण करचे खातीर अमानूश छळ करताले, तातूंतल्या गोंयच्या लोकांची सुटका करून धर्माचें रक्षण करपाचें काम केलां, अशें समाज कल्याण मंत्री सुभाष फळदेसाय हांणी सांगलें.

रुमडामळ दवर्ले शिवजयंती कार्यावळी वेळार समाज कल्याण मंत्री सुभाष फळदेसाय उलयतले. ह्या वेळार आमदार उल्हार तुयेंकार, भाजप प्रदेशाध्यक्ष दामू नायक, जिल्हो पंचायत वांगडी परेश नायक, विशेश नायक हाजीर आशिल्ले.

मडगांव पालिका, गोंय पर्यटन विभाग आनी शिवसाम्राज्य संस्था मडगांव हांच्या जोडपालवान ऋषिरंभा राखणदेव देवस्थाना कडल्यान शिवजयंती मिरवणुकेक सुरवात जाली. हे मिरवणुकेंत हजारांनी शिवमोगींनी वांटो घेतिल्लो. तशेंच मडगांवां रवीन्द्र भवन, पाजीफोंड जुन्ता क्वॉटर्स, घोगळांतले राजे बॉयज हांचे सयत हेर वाठारांनी शिवजयंतीची खोस दिसताली.

मडगांवां विवीध गटां कडल्यान शिवजयंती निमतान कार्यावळींचें आयोजन केल्लें. शिवसाम्राज्य आनी मडगांव पालिके वतीन काडिल्ले मिरवणुकेंत शिवरायांच्यो घोशणा दिल्यो. मडगांव पालिके कडल्यान सकाळीं तीन गटांत चित्रकला सर्तीचें आयोजन केल्लें जाल्यार सांजे वेलार नगरपालिका चौकांत एकपात्री सर्तीचें आयोजन केल्लें.

पाजीफोंड जुन्ता क्वॉर्टर्सांतल्या घुमटेश्वर सांस्कृतीक संघा वतीन शिवजयंती मनयली. ह्या वेळार भाजप प्रदेशाध्यक्ष दामू नायक हांणी सांगलें, घुमटेश्वर सांस्कृतीक गटा वतीन फाटलीं कितलीशींच वर्सां शिवजयंतीचें आयोजन करतात. ही परंपरा कायम राखल्या. शिवरायांचे जिणेचेर आदारीत पुस्तकांचें वाचन करतात. व्याख्यानांचें आयोजन करतात. तातूंत नवे पिळगेक शिवरायांच्या वळख करून दिवन प्रेरणा दिवपाचें काम करतात, अशें तांणी सांगलें.

मडगांवां रवीन्द्र भवनांत लेगीत छत्रपती शिवाजी महाराजांची जयंती उमेदीन मनयली. ह्या वेळार मडगांव रवीन्द्र भवनाचे उपाध्यक्ष मनोहर बोरकार, वांगडी सचीव आग्नेलो फर्नांडीस, नगरसेविका श्वेता लोटलीकार आनी कर्मचारी वर्ग हाजीर आशिल्लो.

उपाध्यक्ष बोरकार हांणी सांगलें, मा ता जिजाऊ हांचे कडल्यान छत्रपतींक बरे संस्कार मेळ्ळे आनी तांणी 16 व्या वर्साच स्वराज्याची स्थापना केली. हिंदू समाजाचेर जावपी अन्याया आड लोकांक देवा बगर आदार नासतना शिवरायांनी लोकांच्या रक्षणा खातीर लडो दीत देव, देश आनी धर्माचें रक्षण केलें. शिवरायांचो वावर हो एका धर्मा खातीर नाशिल्लो जाल्यार तांणी सगळ्या धर्मांच्या लोकांक एकवटीत दवरून स्वराज्याची स्थापना केली. तांचे कडल्यान आयचे पिळगेन खूब कितें शिकपा सारकें आसा, अशें मत बोरकार हांणी उक्तायलें. वांगडी सचीव आग्नेलो हांणी सांगलें, छत्रपती शिवाजी महाराज हें फकत एक नांव न्हय जाल्यार ती विचारधारा आसा, प्रेरणा दिवपी व्यक्तीमत्व आसा. सगळ्या धर्मियांक, समाजाच्या सगळ्या पांवड्या वयल्या लोकांक एकवटींत रावून समाजाचो विचार तांणी दिलो. तशेंच आतांय लेगीत सगळ्यांक वांगडा घेवन फुडें वचपाच्या तांच्या विचारांची गरज आसा, अशें मत उक्तायलें.