भांगरभूंय | प्रतिनिधी
12 जाणांक अटक; 7 लॅपटॉप, 8 मोबायल जप्त
भांगरभूंय । प्रतिनिधी
म्हापशें : आसगांवां रॉयल आसगांव रिसॉर्टाच्या रिसोर्ट स्वरुपांतल्या व्हिलांत चलपी ऑनलायन बेटींग रॅकेट धरलें. ह्या जुगार प्रकरणांत 12 जाणांक अटक करून 7 लॅपटॉप आनी 8 मोबायल फोन जप्त केले.
अटक केल्ल्या दुबावितां मदीं अस्लम हकीम मोहम्मद (रा. राजस्थान), मोहम्मद मुस्ताक हुसेन (रा. राजस्थान), वसीम शाहजॉव मोहम्मद (रा. राजस्थान), आयन अली बुखारी (रा. राजस्थान), आझान इर्फान नागोरी (रा. गुजरात), वहोरा मोहम्मद अब्दूलकरीम (रा. गुजरात), वहोरम सलिमभाई (रा. गुजरात), मेहोम अल्फाझ अब्दूलरशीद (रा. गुजरात), पठाण दिलशान खान (रा. गुजरात), मोहम्मद अफझल खान सोरगार ( रा. राजस्थान), मोहम्मद इनायत शाह (रा. राजस्थान) आनी शराफत खान भिशती (रा. राजस्थान) ह्या 19 ते 24 पिराय गटांतल्या तरणाट्यांचो आस्पाव आसा.
फाटल्या कांय दिसां सावन रॉयल आसगांव रिसोर्ट स्वरुपांतल्या व्हिलांत बेकायदो जुगार अड्डो स्थापन केला आनी तातूंत क्रिकेट, फुटबॉल तशेंच हेर खेळां प्रकारांतल्या मॅचींचेर ऑनलायन बेटींग घेतात, अशी म्हायती हणजूणें पुलिशेच्या खात्रेच्या सुत्रां कडल्यान मेळिल्ली. ते प्रमाण पुलिसांनी बुधवारा 19 फेब्रुवारीक फांतोडेर त्या व्हिलाचेर धाड घातली. तेन्ना बेटींग घेवपाचें सत्र चलतालें. पुलिसांनी दुबावितांक ताब्यांत घेतले आनी 7 लॅपटॉप आनी 8 मोबायल फोना सयत 6 लाखांचें सामान जप्त केलें.
ह्या बेटींगच्या माध्यमांतल्यान सुमार 3.50 लाखांचे रकमेचो वेव्हार दुबावितांनी केल्ल्याचें पुलीस चवकशेंतल्यान उक्तें जालें. पुलीस निरिक्षक सुरज गांवस हांच्या मार्गदर्शना खाला पुलीस पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
