भांगरभूंय | प्रतिनिधी
पणजी : रॉटवीलर आनी पिटबूल ह्या हिंसक सुण्यांचेर बंदी घालपाचो निर्णय सरकाराने घेतला. अध्यादेशांत गरजेची आशिल्ली दुरूस्ती करून बंदी घालतले. मंत्रिमंडळ बसके उपरांत पत्रकार परिशदेंत मुख्यमंत्री डॉ. प्रमोद सावंत हांणी ही म्हायती दिली.
ल्हान भुरग्यां सयत हेरांचेर रॉटवीलर आनी पिटबूल सुण्यांनी हल्ले केल्ल्याच्यो तशेंच चाबिल्ल्याच्यो घडणुको घडल्यात. उपरांत ह्या जातीच्या सुण्यांचेर बंदी घालपाची मागणी राज्यांत जाताली. हे मागणेवेल्यान बंदी घालपाक मंत्रिमंडळान मान्यताय दिल्या.
रॉटवीलर आनी पिटबूल जातीचे जे सुणे आसात तांणी सुण्यांची नोंदणी करप गरजेचें. नवे सुणे घेवपाक बंदी घालतले, अशें डॉ. सावंत हांणी म्हणलें. नोंदणी उपरांत राज्यांत रॉटवीलर आनी पिटबूल जातीचे सुणे खंय आनी कितले आसा, हाची म्हायती मेळटली. तशेंच हाचे मुखार ते आयात करपाचेर बंदी घाल्ल्यान तांचो आंकडो आनीक वाडचो ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
