भांगरभूंय | प्रतिनिधी
नवी दिल्ली, खबरां संस्था ः संवसारभर 1 अब्ज परस चड लोक मोटसाणीक लागून त्रास सोंसतात. हो आंकडो सतत वाडत आसा. आतां भारतांतय पारंपारीक पद्दतीं बदला मोटसाण उणी करपाक आनी वजन उणें करपाक नव्यान सोदून काडिल्लीं वखदांचो वापर करपाचो ट्रेंड वाडत आसा. व्हड प्रमाणांत सक्षम लोक आहार आनी व्यायाम सोडून मोटसाण उणी करपाक वखदां सोदतात. हाकाच लागून फाटल्या पांच वर्सांत अशा वखदांची भारतीय बाजारपेठ सुमार चार पटींनी वाडला.
ओझेम्पिक, जेपबाउंड, मोंजारो, वेगोवी ह्या वजन उणें करपी वखदांचो ब्रँड परकी बाजारांत चड लोकप्रिय जावपाक लागला. पूण संवसारीक पुरवणीच्या कांय कारणांक लागून ह्या वखदांचे नवीन फॉर्म्युलेशन भारतांत मेळनात. पूण तांचे आयात केल्ले बल्क पॅक आनी पर्यायी वखदां देशांतल्या ग्रे मार्केटांत भरपूर प्रमाणांत विकपाक लागल्यात. अशीं वखदां तयार करपी कंपनी आतां भारतांतल्या वाडपी मोटसाणीच्या बाजारपेठेचो फायदो घेवपा खातीर हांगा येवपाची येवजण करतात. हांतूत अमेरिकेची एली लिली आनी डेन्मार्काची नोवो नॉर्डिस्क हे मुखेल आसात. एली लिलीन 2025 वर्सा टिर्झेपॅटाइड (मोंजारो) भारताच्या बाजारांत हाडपाची येवजण आंखता आनी नोव्हो नॉर्डिस्क 2026 मेरेन सेमॅग्लुटायड बाजारांत हाडपाची येवजण आंखता. कंपनी ही वखदां रायबेलसस, ओझेम्पिक, आनी वेगोवी ह्या ब्रँड नांवान विकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
