भांगरभूंय | प्रतिनिधी
मडगांव ः नेण्टे चलयेचेर लैंगीक अत्याचार केल्ल्या प्रकरणांत कुंकळ्ळी पुलिसांनी सुशान केवल नायक (मुळ, झारखंड) हाका अटक केली. मेळिल्ले म्हायती प्रमाण, कुंकळ्ळी वाठारांतल्या 14 वर्सां पिरायेच्या चलयेचेर लैंगीक अत्याचाराची कागाळ आयले उपरांत कुंकळ्ळी पुलिसांनी गोंय बाल संरक्षण कायदो आनी पोक्सो कायद्या खाला गुन्यांव नोंद केल्लो. ह्या प्रकरणाचो तपास करुन कुंकळ्ळी पुलिसांनी आतां सुशान केवल नायक ह्या दुबाविताक अटक केल्या.
दुबावीत मुळ झारखंडाचो आसून सध्या तो सारझोरा भाड्याच्या घरांत रावतालो. दुबावीत सुशानान पयली नेण्टे चलयेक घेवन झारखंडांतल्या एका गांवांत गेलो. उपरांत तिका परत गोंयांत हाडली. ही घडणूक 2 जानेवारी ते 14 फेब्रुवारी ह्या काळांत घडली. ह्या काळांत दुबावीतान चलयेचेर लैंगीक अत्याचार केलो आनी ताका लागून ती गुरवार जाली.
नेण्टे चलयेच्या आवय-बापायन कुंकळ्ळी पुलिशेंत केल्ले कागाळीचे आदारुन पुलिसांनी दुबाविताक ताब्यांत घेतलो आनी चवकशी उपरांत ताका अटक केली. कुंकळ्ळी पुलीस निरिक्षक डायगो ग्रॅसिअस हांच्या मार्गदर्शना खाला ह्या प्रकरणाचो फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
