भांगरभूंय | प्रतिनिधी
केरळचे राज्यपाल राजेंद्र आर्लेकार
कोच्चीः ‘काळीज उसवलां’ हें पुस्तक आमी जशें जशें वाचीत फुडें वतात, तशे तशें ह्या पुस्तकाच्या दरेक पानांतल्यान आमकां फाटल्या काळांतल्या विसरुंक लागिल्ल्या घडणुकांचो आनी आमचेर जाण्ट्यां कडसून घडिल्ल्या संस्काराच्यो यादी जाग्यो जावंक लागतात. कांय शेंकड्या आदीं हांगा केरळांत येवन स्थायीक जाल्ल्या कोंकणी समाजाक हें पुस्तक वाचून आपलीं मुळां याद जावंक पावतली. उदय म्हांबरो हांची लेखनाची शैली काळजाक हात घालपी आसा. एखाद्र्या व्हांवत्या न्हंये सारके तांचे बरोवप वाचप्याक केन्ना आपलोसो करता ते कळना, अशें केरळचे राज्यपाल आनी गोंय विधानसभेचे आदले सभापती राजेंद्र आर्लेकर हांणी म्हणलें.
उदय म्हांबरो हांच्या ‘काळीज उसवलां’ ह्या कोंकणी पुस्तकाचो बालकृष्ण मल्ल्या हांणी मल्याळम भाशेंत अणकार केला. हें अणकार केल्लें पुस्तक कोचीन शारांत लोकार्पण करतना जाहीर कार्यावळींत राज्यपाल आर्लेकार उलयताले. हें पुस्तक कोचीनच्या प्रबोधा प्रकाशन हे संस्थेन उजवाडायलां. ह्या वेळार माचयेर मूळ कोंकणी लेखक उदय म्हांबरो, प्रकाशक नवीन कुमार, मल्याळम भाशेंतले ज्येश्ठ लेखक एम के सानू, कार्यावळीचे आयोजक पी जी कामत संस्थेचे अध्यक्ष आनंद कामत, प्रबोधा ट्रस्टाचे अध्यक्ष विनोदकुमार आनी एस. एन. वि. सदनमच्यो सचीव डॉ. गीता हाजीर आसले.
जण एकल्यान आपले मायभाशेचो अभिमान बाळगूंक जाय. केरळांतल्या कोंकणी समाजान कोंकणीचो प्रसार आनी प्रचार वाडोवंक जाय. गोंया भायर विस्थापीत जाल्लो कोंकणी समाज साडेचारशे पांचशे वर्सांच्या काळा उपरांतूय कोंकणी बरयता, उलयता तेखातीर तांणी कोंकणी समाजाची तोखणाय केली. संवसारांत खंयूय जरी पावले तरी कोंकणी मनीस आपली भास विसरना हाचे विशीं तांणी अभिमान उक्तायलो.
कोंकणीतल्यान मल्याळम भाशेंत अणकारीत जाल्लें हें पांचवे पुस्तक अशें पि.जी. कामत फावंडेशनाचे अध्यक्ष आनंद कामत हांणी पुस्तकाचेर उलोवप करतना म्हणलें.
ह्या वेळार उलयतना उदय म्हांबरो हांणी वाचकांचो मूळ कोंकणी पुस्तकाक उपाट मोग मेळिल्ले खातीर वाचकांचे उपकार आठयले. तशेंच ह्या पुस्तकाच्या निमतान मल्याळम आनी कोंकणी साहित्यीक आनी साहित्या भितर नवें यूग सुरू जावं अशी आस्त उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
