भांगरभूंय | प्रतिनिधी
मडगांव : ब्रिटीश, आयरिश नागरीक डॅनियली मॅकलॉग्लीन हिचेर लैंगीक अत्याचार करुन खून केल्ल्या प्रकरणांत आरोपी विकट भगत हाका न्यायालयान जल्मठेप आयकयली. तशेंच सश्रम बंदखण आनी दंडूय दिला.
मडगांवच्या दक्षीण गोंय सत्र न्यायालयांत डॅनियली मॅकलॉग्लिन हिच्या खुना प्रकरणांत खटलो सुरू आसा. ह्या प्रकरणांत विकट भगत हाका न्यायालयान लैंगीक अत्याचार करप, खून करप आनी पुरावे नश्ट करप ह्या आरोपां खाला दोशी थारायला. ह्या ाप्रकरणांत ४६ साक्षीदारांचे जबाब नोंद केल्यात. आरोपी विकट भगत हाका न्यायालयान खून प्रकरणांत दोशी थारोवन जल्मठेप आनी सश्रम बंदखणीची ख्यास्त काणकोणच्या राजबाग आगोंदा १३ मार्च २०१७ दिसा आयरिश नागरीक डॅनियलीचो खून जाल्लो. खुना पयलीं तिचेर लैंगीक अत्याचारूय जाल्ल्याचे वैजकी अहवालांतल्यान स्पश्ट जाल्लें. ह्या खुनाक लागून विदेशांतूय हाची चर्चा जाल्ली. ह्या प्रकरणांत फिलोमिना कॉस्ता, तत्कालिन पुलीस निरीक्षक राजेंद्र प्रभुदेसाय हांणी तपास अधिकारी म्हणून काम पळयलें. काणकोण पुलिसांनी खुनाचो छडो लावन काणकोणच्या भगतवाडो हांगचो दुबावीत विकट भगत हाका अटक केल्ली. तेन्ना ताची पिराय २४ वर्सां आशिल्लीं. विकट आनी डॅनियली हांचे मदीं इश्टागत आशिल्ली आनी खुना उपरांत डॅनियलीचो मोबायलूय चोरी जाल्लो. तिच्या आंगार ७ जखमो आशिल्ल्यो हें स्पश्ट जाल्लें. हे विशीं दुबावीत विकटचें बंदखणींत वागपूय सारकें नाशिल्ल्यान बेडयो घालून सुनावणेक हाडपाचो आदेश ह्यान पयलीं न्यायालया कडल्यान दिल्लो. उपरांत व्हिडिओ कॉन्फरन्सिंगाचेर ही सुनावणी सुरु आशिल्ली. निवाड्याच्या सुनावणेक दुबावीत विकट हाका प्रत्यक्ष हजर करपाक सांगिल्लें. ते प्रमाण सोमाराय पुलिसांनी आरोपी विकटाक न्यायालयांत हजर केल्ले.
काणकोण पुलिसांनी ह्यान पयलीं विकटाचेर न्यायालयांत वट्ट ३७४ पानांचें आरोपपत्र दाखल केल्लें आनी तिचेर खून करप, लैंगीक अत्याचार करप, जबरी चोरी आनी पुरावो नश्ट करपाचो यत्न अश्या जायत्या कलमा खाला गुन्यांव नोंद केल्लो. सरकारी पक्षाच्या वकिलान ह्या खटल्याची सुनावणी गतीन करची, अशी मागणी केल्ली. हे फाटभूंयेर सुनावणेक गती दिल्ली.
ख्यास्त आयकयतना डॅनियलाचें कुटूंब आशिल्लें हजर
डॅनियलीचेर अत्याचार आनी खून प्रकरणांत आरोपी विकट भगत हाका दोशी थारयल्या उपरांत डॅनियलीच्या कुटुंबीयांनी न्याय मेळिल्ल्याच्यो भावना उक्तायल्यो. आतां आरोपीक ख्यास्त आयकयतनाय डॅनियलीचें कुटुंबीय आनी इश्ट हे न्यायालयांत हजर रावले.
ऍड. विक्रम वर्मा हांणी, आरोपी विकट भगत हाका जल्मठेपेची ख्यास्त आयकयतना आयिल्ल्यान सश्रम कारावासाची ख्यास्तूय आशिल्ल्यान आजल्म सश्रम बंदखण भोगची पडटली. हाका लागून डॅनियली हिच्या कुटुंबीयांक न्याय मेळिल्ल्याची भावना आसा. आठ वर्सां ह्या प्रकरणाची सुनावणी सुरु आशिल्ली. साक्षीदारांक सोदप ही सामकी कठीण गजाल, पुरावे सोदपा खातीर पुलिसांनी बरें काम केलां. राज्या भायल्या साक्षीदारांकूय सोदून न्यायालया मुखार हजर केला. हाका तपास अधिकारी राजेंद्र प्रभूदेसाय आनी तांच्या वांगोड्यांनी खूब त्रास घेतले. सरकारी वकील व्ही. जी. कॉस्ता, अॅड. देवेंद्र कोरगांवकार आनी ऍड. संजय सामंत हांणीय बरे तरेन बाजू मांडली. अभियोक्ता संचालक पूनम भरणे हांचेंय उपकार मानता. ह्या निर्णयाक लागून आठ वर्सांच्या कळाव जाला आसत, मात डॅनियली हिच्या कुटुंबीयांक न्याय मेळ्ळो, अशें वर्मा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
