भांगरभूंय | प्रतिनिधी
केंद्रीय अर्थसंकल्पांत गोंयचे उदरगती खातीर बरी तरतूद
पणजी : राज्याच्यो तशेंच लोकांच्यो समस्या जाणून घेवपाक केंद्र तशेंच राज्य सरकाराच्या कार्यालयांक भेटी दिवपाचो मनोदय राज्यसभा खासदार सदानंद शेट तानावडे हांणी उक्तायलो. जनते कडेन संवादूय सादतले, अशें तांणी म्हणलें. केंद्रीय अर्थमंत्री निर्मला सीतारामन हांणी विकसीत भारत २०४७ चे उद्दिश्ट दवरून सादर केल्ल्या अर्थसंकल्पांत गोंयां खातीर बरीच तरतूद आसा. पर्यटन, नुस्तेंमारी, बंदरांची उदरगत, येरादारी, पायाभूत सुविधा हे खातीर आशिल्ल्यो येवजण्यो, तशेंच निधीचो गोंयांक सगळ्यांत चड लाव जातलो, अशें राज्यसभा खासदार सदानंद शेट तानावडे हांणी म्हणलें.
तानवाडे हांणी भाजप कार्यालयांत पत्रकार परिशद घेतली. ह्या वेळार पक्षाचे पदाधिकारी प्रेमानंद म्हांब्रे हजर आशिल्ले.
प्रधानमंत्री नरेंद्र मोदी हांणी गोंयचेर सदांच मायेचो हात दवरला. राज्य सरकार वा मुख्यमंत्री डॉ. प्रमोद सावंत हांणी ज्यो मागण्यो केंद्रा कडेन आयज मेरेन केल्यात, त्यो सगल्योच पुराय जाल्यात. डबल इंजीन सरकाराक लागून फाटलीं धा वर्सां राज्याची पूर्ण उदरगत जाल्या. आतांचा केंद्रीय अर्थसंकल्पूय गोंयची उदरगत चालीक लावपी आसा. पर्यटनांत गोंयांक सगळ्यांत चड निधी मेळटलो. तशेंच शेती, उद्देग, म्हायती तंत्रज्ञान ह्या मळाचेरूय केंद्रीय येवजण्यांचो लाव गोंयांक जातलो.
संसद अधिवेशनांत हांवें जायते प्रस्न विचारिल्ले. तरीय फकत णव प्रस्न चर्चेक आयले. राज्याच्या तशेंच लोकांच्या समस्यांचेर आदारून प्रस्न विचारपा खातीर आतां हांव केंद्र तशेंच राज्य सरकाराच्या कार्यालयांक भेटी दितलों. तशेंच लोकां कडेन संवादूय सादतलों अशें तांणी म्हणलें.
पणजे सध्या स्मार्ट सीटीचीं कामां नेटान सुरू आसात. पर्वरी फ्लायओवरच्या कामाक लागून येरादारी कोयंडी जाता. स्मार्ट सीटी तशेंच फ्लायओव्हराचें काम जाले उपरांत येरादारी आनीक सुरळीत जातली. उदरगती खातीर दरेकल्याक मात्शे त्रास सोंसचेच पडटात. जुवारी पुलाच्या कामाक लागून बरीच आडखळ जाताली. आतां पूल जाले उपरांत पणजी – मडगांव, पणजी – वास्को येरादारी आनीक सुरळीत जाल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
