भांगरभूंय | प्रतिनिधी
६० लाख ते ३ कोटीं मेरेन दंड भरपाची नोटीस जारी
पणजी : शुल्क भरिनासतना वीज खात्याच्या खांब्यांक ब्रॉड बॅन्ड केबल बादिल्ले खातीर वीज खात्या वतीन विवीध कंपनींक अर्थीक दंड दिवपाची मोहीम चालूच आसा. आतां आनीक ६ कंपन्यांक दंड दिला. दरेकी ६० लाख ते ३ कोटी रुपयां मेरेन थकबाकी सयत दंडाची रक्कम भरपाची नोटीस जारी केल्या.
ह्यान पयलीं वीज खात्यान ब्लीटझ ग्लोबल टेक्नोलॉजीजाक १.८० कोटींचो दंड दिल्लो. आतां फास्ट जेट टेलीकॉम (३ कोटी), डिजीटल नेटवर्क असोसिएशन (३ कोटी), ग्रीन फायबर (३ कोटी), सीटी नेट (६० लाख), एडजेकॉम टेलीकम्युनिकेशन्स (३ कोटी) आनी जीडीएन (९० लाख) ह्या कंपनींक दंड दिला. वीज खांब्यांक केबल बांदपा खातीर विवीध कंपनीं कडल्यान सुमार ५० कोटीं येणें आसा. तांकांय नोटीस जारी करतले, अशी म्हायती कार्यकारी अभियंते काशिनाथ शेट्ये हांणी दिली.
ब्रॉड बँड तशेंच हेर केबल, वायरी लायटीच्या खांब्यांक बांदून विवीध कंपनी तशेंच एजन्सी कडल्यान इंटरनेट तशेंच हेर सेवा दितात. हाचें शुल्क भरूंक नाशिल्ले खातीर वीज खात्यान केबल तोडून उडोवपाची मोहीम सुरू केल्ली. २०२०- २१ ते २०२४- २५ ह्या पांच वर्सांचें शुल्क कंपनींनी भरूंक ना. वर्साक दरेका खांब्याक ३०० रूपया, हे प्रमाण ५ वर्सां खातीरचें शुल्क आनी लुकसाण भरपायेची रक्कम भरपाची नोटीस जारी केल्या. कांय केबल ऑपरेटरवाल्यांनी केबल तोडपाचे घडणुके आड उच्च न्यायालयांत याचिका दाखल केली. ही याचिकाय भायर मारली. उपरांत केबल ऑपरेटर संघटणा आनी वीज खात्याची बसका जाली. वीजमंत्री सुदिन ढवळीकार हांणीय तोडगो काडपा खातीर बसका घेतली. आजून हे विशीं तोडगो काडूंक ना.
टेलीकॉम धोरणा प्रमाण वीज खांब्यांक केबल बांदपा खातीर आशिल्ल्या शुल्काची थकबाकी भरप गरजेचें. शुल्काची थकबाकी भरपा खातीर नोटीसो जारी करपाची प्रक्रीया सुरू जाल्या. नोटीस जारी जाले उपरांत दंड वसूल करपाची जापसालदारकी संबंदीत अभियंत्यांची आसतली. दंड वसूल जावंक ना जाल्यार संबंदीत अभियंत्यांक दंड जारी करतले, अशें कार्यकारी अभियंते काशिनाथ शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
