भांगरभूंय | प्रतिनिधी
नवी दिल्ली, खबरां संस्था: दिल्लीक आयज सकाळीं ५.३६ वरांचेर नेटान भुंयकांपाचे धक्के जाणवले. ४.० रिश्टर स्केल खर भुयकांपाची नोंद जाल्या. राष्ट्रीय भुंयकांपशास्त्र केंद्राच्या मतान, भुंयकांपाचें केंद्र दिल्लीक आशिल्लें. भुंयकांपाचे केंद्रबिंदू धर्तरेच्या पृष्ठभागा पसून फकत ५ किमी सकयल आशिल्ले. पृष्ठभागा पसून पांच वा धा किमी सकयले भुंयकांप चड लुकसाण करतात.
भुंयकांपा उपरांत प्रधानमंत्री नरेंद्र मोदी हांणी लोकांक शांत रावपाचो, सुरक्षिततेच्या खबरदारीचे नेम पाळपाचो आनी जाणवपी आफ्टरशॉक खातीर सतर्क रावपाचो उलो मारलो. तशेंच, अधिकारी परिस्थितीचेर बारकायेन लक्ष दवरून आशिल्ल्याची म्हायतीय तांणी ‘एक्सा’ वरवीं दिली.
भुंयकापाचे नदरेन सक्रीय क्षेत्रांच्या झोन चारांत दिल्लीचो आसपाव आसा. ही श्रेणी दुसर्या क्रमांकाची सर्वोच्च श्रेणी आसा. फाटल्या कांय वर्सांनी दिल्लींत ४ रिश्टर स्केलचे जायते भुंयकांप जाले. २०२२ त दिल्लीच्या शेजारच्या हरियाणा राज्यांत ४.१ रिश्टर स्केलाचो भृंयकांप जाल्लो. युएस जिओलॉजिकल सर्व्हेच्या आंकडेवारी प्रमाण फाटल्या १० वर्सांनी दिल्लींत ५ रिश्टर स्केला परस चड खर भुंयकांप नोंद जावंक ना.
आयज सकाळीं भुंयकांपाचे धपके जाणवले उपरांत लोक घरा भायर आयले. सोशल मिडियाचेर हाचे व्हिडिओ व्हायरल जाल्ल्यान लोकां मदीं भंय पातळ्ळा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
