भांगरभूंय | प्रतिनिधी
वाळपय: वाळपय नगरपालिकेचे इमारतींत आशिल्ल्या रिकाम्या दुकानांचो आतां पावणीि करतले. हाका लागून जांकां हीं दुकानां जाय तांणी नगरपालिकेक संपर्क करचो असो उलो नगरपालिका मंडळान मारला. सध्यातरी नगरपालिका प्रशासकीय इमारती मुखार आशिल्ले इमारतींत जायतीं दुकानां रिकामी आसात. हे विशीं नगरपालिकेन पावणी प्रक्रिया जाहीर केल्ली. मात अपेक्षीत प्रमाणांत प्रतिसाद मेळूंक ना. हाका लागून नगरपालिका कायद्याच्या मार्गदर्शक तत्त्वांची अंमलबजावणी करून हीं रिकामीं दुकानां आतां इत्सा आसा त्या नागरिकांक दितले, अशें मंडळान स्पश्ट केलां. गोंय शारी उदरगत एजन्सी वरवीं नगरपालिकेच्या कार्यालयांची इमारत आनी ताचे मुखार वेवसायीक इमारत उबारिल्ली. हीं दुकानां जाय तांणी नगरपालिकेक संपर्क करचो असो उलो नगरपालिकेन मारला. नागरी पुरवण खात्याचो कारभार हे इमारतींत हालयलां. उपरांत मोबायल ग्राम न्यायालयाचें कार्यालय हांगा सुरू केलें. हातूंतल्यान नगरपालिकेक बरो महसूल मेळ्ळो. सध्या रिकामी आशिल्लीं दुकानां भाड्यान गेल्यार ताचे वरवीं बरो महसूल नगरपालिकेचे तिजोरेंत येतलो.
दुकानांची थकबाकी वसूल करतले
मजगतीं, नगरपालिकेचीं दुकानां जायत्या जाणांनी चलोवपाक घेतिल्लीं. कांय दुकानदारांनी तीं मदींच बंद केलीं. मात नगरपालिकेक अजूनय भाड्याची रक्कम भरूंक ना. कांयजाण एक लाख मेरेन भरपाचे आसात. हे विशीं नगरपालिकेन खर पावल उबारलां. कांय प्रकरणां न्यायप्रविष्ठ जाल्यांत. मात येवपी काळांत थकबाकी वसूल करपा विशीं नगरपालिका कोणाचेंच चुरचुरें करची ना, अशें अधिकार्यांनी स्पश्ट केलां.
थेटराचो वापर सभाघर पद्दतीन करतले
नगरपालिकेचे इमारतींत आशिल्लें थेटर दोन वर्सां सावन बंद आसा. हाका लागून सध्या थेटराचें रुपांतर सभाघरांत करपाचो नगरपालिकेचो विचार आसा. हे विशीं नगरपालिकेचे बसकेंत चर्चा केल्या. हे विशींची चाचपणी सुरू आशिल्ल्यान शक्य आसल्यार बरे तरेचें सभाघर नागरिकां खातीर उपलब्ध करपाची संद नगरपालिकेक मेळटली. कार्यावळीं खातीर हें सभाघर बरे तरेन वापरूं येता. दुरुस्तीचें काम पुराय जाले उपरांत पालिका संचालनालयाचे परवानगेन आनी नगरपालिकेचे बसकेंत मंजुरी घेवन हें सभाघर नागरिकां खातीर उपलब्ध करपाचो नगरपालिकेचो विचार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
