सद्दां अर्द वर चलत जाल्यार……

भांगरभूंय | प्रतिनिधी

दिसपट्टे धांवपळींत आमी चड करून आमचे भलायके कडेन लक्ष दिनात. पूण पुश्टीक जेवण आनी नेमान व्यायाम केल्यार भलायकी बरी दवरपाक मदत जाता. नेमान चलप हो व्यायामाचोच एक प्रकार. खरें म्हणल्यार चलपाचे अगणीत फायदे आसात. दिसाक १० हजार पावलां जरी तुमी चलना जाल्यार लेगीत दिसाक फकत ३० मिनटां चलप तुमचे भलायकेक फायद्याचें थारूंक शकतात. आयज आमी ह्या फायद्यां विशीं जाणून घेवया.
हैदराबादच्या अपोलो हॉस्पिटलाचे न्यूरोलॉजिस्ट डॉ. सुधीर कुमार सांगतात, ३० मिनटां चलपाचे जायते भलायकेचे फायदे आसात. नेमान ३० मिनटां चलिल्ल्यान वजन चड प्रमाणांत वाडप, मोटेपणां, टायप- गोडेंमूत, उच्च रक्तदाब, काळजाचो आताक, स्ट्रोक, कर्करोग आनी अचकीत मरणाचो धपको हांची शक्यताय उणी जाता.
चलप हाडांच्या आनी स्नायूंचे भलायके खातीर फायद्याचें. ऑस्टिओपोरोसीस म्हणल्यार हाडां दुबळीं जावप, सार्कोपेनिया म्हणल्यार स्नायूंचें वजन उणी जावन काम करपाची तांक उणी जावप, डायनेपेनिया म्हणल्यार स्नायूंची तांक उणी जावप अश्या जायत्या दुयेंसांचो धोक नेमान ३० मिनटां चलिल्ल्यान उणो जाता. डॉ. कुमार सांगतात, चलिल्ल्यान मानसीक आनी मेंदवाची भलायकी सुदारता.
दिल्लीच्या सी. के. बिर्ला हॉस्पिटलाच्या फिजिओथेरपीचे मुखेली डॉ. सुरेंदर पाल सिंग सांगतात, दिसांक ३० मिनटां चलप म्हणल्यार वजन उणें करप आनी काळीज तशेंच रगताच्या शिरांचे भलायके खातीर खूब फायद्याच्यो.

योग्य तरेन कशें चलचें?
डॉ. सिंग हांणी, वेग हो सगळ्यांत म्हत्वाचो घटक. चड ल्हव चलप तितलें प्रभावी न्हय. चलपाचो चड फायदो मेळोवपा खातीर काळा प्रमाण चलपाची गती वाडोवप म्हत्वाचें. कारण- वेगान चल्ल्यार चरबी उणी जावपाक आदार जाता. काळीजाची भलायकी आनी स्वासा कडेन संबंदीत भलायकी सुदारता. धोलत धोलत चलून फायदो ना.
एकाच वेळार ३० मिनटां सेगीत चलप. मदीं पांच मिनटांचो वा धा मिनटांचो विसव घेवन चलप फायद्याचें थारचें ना. डॉ. सिंग म्हणटा, बर्‍या परिणामा खातीर २० ते ३० मिनटां चलपाचें ध्येय थारावचें. ल्हव ल्हव चलत, उपरांत गती वाडोवची. हाका लागून कुडीची कार्यक्षमताय वाडटा. तशेंच काळजाच्या विकारांची भलायकी सुदारपाक, हाडां घट करपाक, स्नायूंची तांक वाडोवपाक आनी चरबी उणी करपाक मदत करता. ल्हवू ल्हवू गती वाडोवन हे फायदे मेळूंक शकतात.