भांगरभूंय | प्रतिनिधी
बेळगांवां घडली घडणूक : रिक्षा चालका आड खुनाचो गुन्यांव
भांगरभूंय । प्रतिनिधी
बेळगांव/ पणजी : बेळगांवां (कर्नाटक) रिक्षा चालकान केल्ल्या मारपेटा उपरांत फोंडेंचे आदले आमदार लवू मामलेदार हांकां ते रावताले त्या लॉजांत वतना मरण आयलें. ह्या प्रकरणांत बेळगांव पुलिसांनी दुबावीत रिक्षा चालक अमिरसुहेल शकीलसाब सनदी (26. सुभाषनगर – बेळगांव) हाचे आड खुनाचो गुन्यांव नोंद केला. मजगतीं, पोस्टमार्टमा उपरांत मामलेदार हांची कूड गोंयांत हाडली. बेळगांव पुलिशे कडेन समन्वय सादून ह्या प्रकरणांतल्या आरोपीचेर खर कारवाय करतले, अशी हमी मुख्यमंत्री डॉ. प्रमोद सावंत हांणी दिल्या.
खाजगी कामा निमतान बेळगांवां गेल्ले लवू मामलेदार खडेबाजार – बेळगांवच्या शिवानंद लॉजांत राविल्ले. शेनवारा दनपारच्या सुमाराक प्रवास करतना तांचे मोटारीचो धपको मुखार आशिल्ले रिक्षेक बसलो. तातूंत रिक्षेचें व्हडलेशें लुकसाण जावंक नाशिल्लें. ताका लागून मामलेदार हांणी माफी मागून लॉजाची वाट धरली. पूण संबंदीत रिक्षा चालकान मात ताचो फाटलाव सुरू केलो. मामलेदार शिवानंद लॉजाच्या पार्कींग वाठारांत मोटार पार्क करतना रिक्षा चालकान थंय येवन मामलेदार हांचे कडेन वाद घालपाक सुरवात केली. तातूंत हें प्रकरण मारपेटा मेरेन पावलें. तातूंत दुबावीत आमिरसुहेल सनदी हाणें लवू मामलेदार हांकां मारपेट करपाक सुरवात केली. लॉज धनया सयत कांय जाणांनी सनदीक आडावपाचो यत्न केलो. पूण तरी लेगीत ताणें मारपेट चालूच दवरलो. ह्या प्रकारा उपरांत स्वताक सावरीत मामलेदार लॉजाची इस्काद चडून आपले कुडींत वचपा खातीर वताले तेन्ना ते कोसळ्ळे. ते परांत लॉज वेवस्थापनान तांकां उपचारा खातीर तांकां तत्काळ हॉस्पिटलांत दाखल केले. पूण दोतोरांनी तांकां थंय मरण आयिल्ल्याचें घोशीत केले.
ह्या प्रकरणाची म्हायती मेळटाच खडेबाजार पुलिसांनी तपासाक गती दिवन लवू मामलेदार हांकां मारपेट करून तांच्या मरणाक कारण थारिल्ल्या अमिरसुहेल समदी हाका ताब्यांत घेवन ताचेर खुनाचो गुन्यांव दाखल केलो.
मजगतीं, ह्या प्रकरणाची म्हायती मेळटाच लवू मामलेदार हांची धूव अक्षता बेळगांवां पावली. बेळगांवचे आमदार आसीफ (राजू) सैत हे लेगीत ह्या वेळार तिचे वांगडा आशिल्ले. मामलेदार हांच्या खून प्रकरणाची खोलायेन चवकशी जावची, अशी मागणी आमदार सैत हांणी ह्या वेळार पुलिसां कडेन केली.
आरोपीचेर खर कारवाय जातली : डॉ. सावंत
पोस्टमार्टमा उपरांत आदले आमदार लवू मामलेदार हांची कूड शेनवाराच बेळगांव सावन गोंयांत हाडली. लवू मामलेदार हांच्या मरणाक लागून आपल्याक दुख्ख जालां. पुलीस खातें आनी राजकारणांत तांणी केल्ली सेवा गोंयकार सदांच उगडासांत दवरतले, अशें सांगून मुख्यमंत्री डॉ. प्रमोद सावंत हांणी लवू मामलेदार हांकां आर्गां ओंपलीं. मामलेदार हांचे कडेन घडिल्ले घडणुकेक जापसालदार आशिल्ल्या आरोपीचेर खर कारवाय जावची, हे खातीर आपूण कर्नाटक पुलिसां कडेन चर्चा करतलों, अशेंय तांणी सांगलें.
ढवळीकार भावां कडल्यान आर्गां
आदले आमदार लवू मामलेदार हांचे वांगडा उपरांतच्या काळांत राजकी मतभेद निर्माण जाले, तरी तांचे कडेन आमचें इश्टागतीचें नातें कायम आशिल्लें. तांच्या मरणाक लागून आमकां दुख्ख जालां, अशें सांगून मगोचे अध्यक्ष दीपक ढवळीकार आनी मंत्री सुदिन ढवळीकार हांणी तांकां आर्गां ओंपलीं.
फोंडें वाठारांत दुख्खाची सया
पुलीस खात्यांत उपनिरिक्षक ते उपअधिक्षक असो प्रवास करपी लवू मामलेदार हांणी 2007 त राजकारणांत प्रवेश केलो. 2012 त पेझाद रवी नायक हांचेर जैत जोडून ते आमदार जाले. पुलीस खातें आनी राजकारणांत येस मेळयले उपरांत लेगीत तांचें सर्वसामान्य लोकां कडेन आशिल्लें नातें कायम आशिल्लें. ताका लागून ते गेल्ल्यान फोंडें वाठारांत दुख्खाची सया पातळ्ळ्या. मजगतीं, मामलेदार हांचे कुडीचेर आयतारा दनपारां फोंडेंचे मसुंडेंत निमाणे संस्कार जातले.
लवू मामलेदार हांचो प्रवास
1981 त पुलीस ख्यात्यांत उपनिरिक्षक पदाचेर रुजू. ते उपरांत उपअधिक्षकपदा मेरेन पावले.
2007 त पयलेच खेपे मगोचे उमेदवारीचेर विधानसभा वेंचणूक लडयली. तातूंत रवी नायक हांचेर 1,409 मतांनी हार घेतली.
2012 तली वेंचणूक परतून मगोचे उमेदवारीचेर लडयली. तातूंत आदले मुख्यमंत्री रवी नायक हांचेर 3,190 मतांनी जैत जोडून आमदार जाले.
2017 चे वेंचणुकेंत तांकां काँग्रेसीच्या रवी नायक हांणी मतांच्या व्हड फरकार हारयले.
हे वेंचणुके उपरांत तीन म्हयन्यां खातीर अखील भारतीय तृणमूल काँग्रेसीचें वांगडी आशिल्ले, पूण डिसेंबर 2021 त तांणी पक्ष सोडलो. जानेवारी 2022 त काँग्रेसींत प्रवेश घेतलो. ते उपरांत ते काँग्रेसीचे कार्यकारी वांगडी म्हूण वावर करताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
