भांगरभूंय | प्रतिनिधी
लोखणाक कोणूच नश्ट करूंक शकना, पूण ताचीच कळम करूंक शकता. तशेंच मनशाचो नाश ताची स्वताची मानसिकताय करूंक शकता.- असो विचार उद्देगपती सर्गेस्त रतन टाटा हांणी उक्तायिल्लो. आमच्या गोंय पुलिसांनी तो घट्ट मतींत दवरून काम करपाची गरज आसा. पूण गुन्यांवाची वृत्ती आशिल्ल्यांचे विचार जंय घुस्पल्यात थंयच्यान तांकां भायर काडप कुस्तारूच न्हय, तर हाता भायर गेलां.
ह्या सगळ्या गजालींची सुलूस घडये मुख्यमंत्री प्रमोद सावंत, जे राज्याचे घर मंत्री आसात, तांकां लागिल्ली आसुंये. कित्याक तर २४ फेब्रुवारी २०२४ त वाळपय जाल्ल्या पुलिसांच्या पासिंग आवट परेडींत तांणी घर खात्यांतल्या कर्मचाऱ्यांक, अधिकाऱ्यांक शिटकायिल्ले. पुलिसांनी चुकीच्यो गजाली करून पुलिसांचे वर्देक दाग लावचो न्हय अशें म्हणिल्लें. मुख्यमंत्र्याक अशें कित्याक म्हणचें पडलें, ताच्या फाटल्यान कितलींशींच कारणां आनी घडणुको आसात. हालींच्या तेंपार कांय पुलीस चोरांच्या हातांत हात घालून नाचतना दिसतात आनी लोकांक लुट्टना, लोकांचेर अन्याय करतना दिसतात. पुलिसांक जे कायद्यान अधिकार दिल्यात ते लोकांक न्याय दिवपाक, अन्याय करपाक न्हय हाचो तांकां विसर पडपाक लागला वा ह्या अधिकारांचो मद मारला आसुंयेता. सगळ्यांकच न्हय, पूण जे भ्रश्ट आसात तांकां.
पुलिसांच्या वर्तनाचेर तर आतां भाजपाचे वरिश्ट फुडारी आनी केंद्रीय मंत्री श्रीपाद नायक हांणीय आपलें मत उक्तायलां. हालींच्या तेंपार पुलिसूय गुन्यांव करतना सांपडटात, ताचेर पत्रकारांनी तांकां तांचें मत विचारलें तेन्ना तांणी ‘हातांचीं पांचूय बोटां सारकीं आसनात’ अशें म्हणलें. श्रीपाद नायक राजकारणी आशिल्ल्यान ते अशें उलोवन आपल्या सरकाराक साल्वार करपाक सोदतले हें समजूं येता, पूण ‘हीं सारकीं नाशिल्लीं बोटां’ लोकांचेर अन्याय करतात तेन्ना भ्रश्टाचाराचो कसलोच दाग नाशिल्ल्या श्रीपाद नायक हांणी हो विशय इतलो सादेपणान घेवप समा न्हय. श्रीपाद नायक, राजेंद्र आर्लेकार हांकां राजकीय वर्तुळांत एक मानाचें स्थान आसा, जें आनीक कोणाक आसा अशें दिसना. ते खातीर तांची जबाबदारी आसा ‘हीं सारकीं नाशिल्लीं बोटां सारकीं करपाची’.
गुन्यांवी वृत्ती आशिल्ले कांय पुलीस इतले सकयल्या पांवड्यार गेल्यात की तांकां गणभेसांत पळोवप म्हणल्यार राज्याचो आनी देशाचो अपमान कसो दिसपाक लागला. चोरांक हाताक घेवन तांचे कडल्यान चोरयो करून घेवप, मटकेकार, जुगारकार, रेंवकार, दर्यादेगे वयले दलाल, स्क्रॅपवाले हांचे कडल्या मेजा पोंदच्यान पयशे घेवप, पर्यटकांक तालांवाच्या नांवान लुटप, बंदखणींत आशिल्ल्या कैद्याक सोडप अशे पराक्रम गोंयांत जायनात?
बरें! बंदखणींतल्यान कैद्याक सोडपी पुलिसा आड देशद्रोहाचें कलम लागना? ताची कित्याक अपुरबाय? बंदखणींत्यान कैद्याक सोडप हें राज्य आनी देशा विरोधांतलें कृत्य न्हय? हांगां लेगीत सॅटिंग?!!! अश्यो घडणुको जातात तेन्ना पुलिसांचेर कोण विस्वास दवरतलो. हेच खातीर घडये विरोधकय म्हणपाक लागल्यात की पुलिसांचो भंय नाशिल्ल्यान गोंयांत गुन्यांव वाडपाक लागल्यात. गुन्यांव वाडटात अशें म्हणलें जाल्यार मागीर मुख्यमंत्री सांगता की गुन्यांवांचो तपास करून गुन्यांवकारांक सोदून काडपाक गोंय पयल्या नंबराचेर आसा. हांगां वशिलो आनी ‘हाताक लायले बगर’ शेणिल्लो फोन लेगीत सोदून काडपाक पुलीस मुखार सरनात. इतली आळस हे यंत्रणेक आयल्या हें सामान्य लोका बगर आनीक कोण सांगपाक शकचो ना.
आमचीं पुलीस यंत्रणां आपल्याक दिल्ल्या अधिकाराचो समाजा खातीर उपयोग करता काय आपल्या सुवार्था खातीर, हें दरेकल्यान चितपाची गरज आसा. घडये जमीन प्रकरणांत भितर आशिल्लो सुलेमान उर्फ सिद्दिकी खान हाचे केशीचेर नदर मारल्यार पुलिसांचे विश्वासाहर्तेची आनी जबाबदारीची जाप मेळत.
सुलेमान सिद्दिकी हाका जे बंदखणींत दवरिल्लो ती बंदखणूच अधिकृत ना हें फाटल्या विधानसभा अधिवेशनांतल्या
सिद्ध जालां. कितलेशेच आरोप आशिल्ल्या अशा गुन्यांवकार अधिकृत नाशिल्ले बंदखणींत दवरपाक लावपी अधिकाऱ्याचेर कारवाय जावंक नाका? विरोधक म्हणटात ते भशेन हाका ‘मम्मी पावडर’ बी लावन सामको लग्नाक व्हरतात तसो बंदखणींतल्यान भायर काडलो आनी पळपाक दिलो. म्हणल्यार ताका राखपाक आशिल्लो पुलिसूच ताका हुबळी व्हरुन पावयता आनी मागीर हो पुलीस शरण येता. हें कितें? आदीं रचिल्लें नाटक? काय सिद्दीकीन दाखयिल्लें हांयस? ताचे उपरांत सिद्दीकीक पळपाक वाट मेकळी करून दिल्ल्या ह्या पुलिसान फिनायल पिल्ल्याची बातमी आयली. पयलीं म्हणल्यार ती फिनायलाची बाटली थंय पावली कशी? काय हें सगळें नाटक लोकांची सहानुभुती मेळोवपाक? काय नाटकाक वेगळें मोडण दिवपाक? हाचे वयल्यान आमची फ्राक जाल्लीं यंत्रणां लोकांचे नदरेंतल्यान पडली.
हें सगळें जाता म्हुणल्यार काँग्रेसचो फुडारी सुनिल कवठणकार हाणें प्रसार माध्यमांक सिद्दीकीचो व्हीडीओ दाखयलो, जातूंत सिद्दीकी आपल्याक पुलिसांच्या दोन पंगडांनीच व्हरून गोंया भायर पावयला, आपल्याक वरिश्ट पुलिसांनी बडयला असो आरोप करता.
हो व्हीडीओचो पॅन ड्रायव्ह आप पक्षाचे फुडारी अमित पालयेकार हांचे कडल्यान सुनिल कवठणकाराक मेळिल्ल्यान, पोरणें गोंय पुलिसांनी दोगांकय समन्स धाडून तपास केलो. तपास करपाचोच. पूण सिद्दीकीन ज्या पुलीस अधिकाऱ्यांचीं आनी राजकारण्याचीं नांवां घेतिल्लीं तांकां कित्याक पुलीस स्टेशनाचेर आपयलेनात? हो तपास निपक्षपातीपणान चलता हें दाखोवपाची संद पुलिसांक आयती चलून आयिल्ली. ती उखलून कित्याक धरली ना? हे खातीर म्हणचें अशें दिसता, कांय पुलीस
सुवार्थ आनी दबाव तंत्राचेर काम करतात!!!
हो सगळो प्रकार जाता म्हणल्यार लजेक पडिल्ल्या गोंय पुलिसान सिद्दीकीक केरळांतल्यान धरून हाडलो आनी तो गोंयांत पावता पावता सिद्दीकीचो आनीक एक व्हीडीओ सोशल मिडियाचेर जारी जालो (काय केलो?) जंय तो आपलो पयलो व्हीडीओ फटीचो म्हूण सांगता. सिद्दीकी पुलिसांच्या ताब्यांत आसतना हो व्हीडीओ कोणें काडलो आनी कोणें सोशल मिडयाचेर घालो ताचो तपास जावंक नाका?
आतां दोन दिसां आदीं सिद्दीकीन पत्रकारांक सांगलां की आपलो दुसरो व्हीडीओ पुलिसांनी ‘गन पाँयटाचेर’ करून घेतला म्हूण. आतां तो सांगता तें कोणाक खरें दिसचें ना? पुलीस आपल्याक शॉक दिता असो आरोपूय ताणें केला. अशा ह्या सिद्दीकीचे हे मुखार कितले व्हीडीओ येत आनी तातूंतल्यान कोणा कोणाक शॉक लागत हें सांगू नजो. ह्या सगळ्या प्रकरणाचेर नदर मारल्यार दुबावाचें बोट पुलिसां वटेनूच वता.
राज्य, देश, कायदो आनी सुवेस्थे आड काम करपी गुन्यांवकार पुलिसा आड जर देशद्रोहाचें कलम लागना, जाल्यार आमचीं यंत्रणां खंयचे वटेन वतात तें कळप कठीण ना. आमच्या पुलीस यंत्रणेक जी भ्रश्टाचाराची कळम लागल्या ती काडून ताका नवो पेंट मारलोना जाल्यार ही बुन्याद केन्ना मातये भरवण जायत सांगू येना. ‘झीरो टॉलरन्स टू करप्शना’ची लाठी घेवन आपल्याच कॅम्पसा भितर घर खात्यान पॅट्रोलिंग करपाची गरज आसा. नाजाल्यार ही कळम स्वता बरोबर गोंयची शांतीताय लेगीत नश्ट करतली.
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
