भांगरभूंय | प्रतिनिधी
वॉशिंग्टन, खबरां संस्था ः अमेरिकेंत विसाव्या शेंकड्याच्या शेवटाक गायच्या दुदाची लोकप्रियता उणी जायत गेली. सोया, बदाम आनी ओट दूद सारकिल्ले पर्याय मुखार आयिल्ले. पूण हालींच्या एका सर्वेक्षणांतल्यान दिसून आयलां, हायड्रेशन, प्रथिनां आनी निरोगी चरबी विशीं लोकांचो विचार बदलत आशिल्ल्यान दुदाची मागणी परतून वाडत आसा. फाटल्या वर्सा परंपरीक दुदाची विक्री 3.2 टक्क्यांनी वाडली, जाल्यार प्लँटबेस्ड दुदाची विक्री 5.9 टक्क्यांनी उणी जाल्या. एकंदरीत डेयरीच्या दुदाची विक्री 1.9% आनी कच्च्या दुदाची विक्री १७.६ टक्क्यांनी वाडली.
हो बदल जायत्या कारणांक लागून जाता. देखीक पोशणा विशीं बदलपी विचार, सोशल मिडियाचेर दुदाची वाडत वचपी लोकप्रियता, दुदा संबंदीत राजकीय चर्चा. सोशल मिडियान दुदाची सांस्कृतीक वळख तयार केलां. जायते जाण रॉमिल्क म्हळ्यार पाश्चरायज करुंक नाशिल्ल्या दुदाक प्रोत्साहन दितात. ताका सुपरफूड म्हणटात. आतां दुद फकत पोशणाक मर्यादीत ना पूण फॅशन आनी ग्लॅमरांतय दुदान आपली सुवात मेळयलां.
2008 वर्सा केल्ल्या एका संशोधना प्रमाण, चॉकलेट दूद खेळगड्यां खातीर गेटोरेड सारकिल्या पेयां परस बरो पर्याय आसूं येता. हाका लागून दुदाक सैमीक पोशण शक्ती केंद्र (natural nutrition powerhouse) म्हूण रिब्रांड केला. भलायकेची जाणविकाय आशिल्ले लोक सैमीक, उण्या प्रमाणांत प्रक्रिया केल्ल्या अन्न पदार्थांक पसंत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
