आमदार दिगंबर कामत निर्दोश

भांगरभूंय | प्रतिनिधी

बेकायदो खण प्रकरणांत एसआयटीन दाखल केल्लें आरोपपत्र

भांगरभूंय । प्रतिनिधी

पणजी : बेकायदा खण खटल्यांतल्यान आदले मुख्यमंत्री आनी आमदार दिगंबर कामत हांची हेर 16 जणां सयत आरोपांतल्यान निर्दोश सुटका जाल्या. प्रधान जिल्हो आनी सत्र न्यायालयान तांकां आरोपांतल्यान मुक्त केल्यात. खासा तपास पंगडान (एसआयटी) जानेवारी 2018 त दिगंबर कामत आनी हेरां आड आरोपपत्र दाखल केल्लें.

2007 ते 2012 मेरेन काँग्रेस सरकार आसतना दिगंबर कामत हे मुख्यमंत्री आशिल्ले. खण खातें लेगीत तांचे कडेन आशिल्लें. कंडोनेशन ऑफ डीले खाला खण लिजांच्या नुतनीकरणाक मान्यताय दिल्ल्याचो आरोप तांचेर आशिल्लो. हाका लागून गोंयाक कोटींनी रुपयांचें लुकसाण जालें अशें म्हणिल्लें. आरोपपत्रांत खणीचे धनी आनी खण खात्याच्या अधिकाऱ्यांचो आस्पाव आशिल्लो. ह्या सगळ्यांची आरोपांतल्यान सुटका जाल्या. प्रधान सत्र आनी जिल्हो न्यायालयान आरोपांतल्यान सुटका केल्ल्यान दिगंबर कामत हांकां थाकाय मेळ्या.

सर्वोच्च न्यायालयान 2012 त एका आदेशा वरवीं गोंयांतल्यो सगळ्यो खणी बंद दवरपाचो आदेश दिलो. हाका लागून गोंयांतलो खण वेवसाय 2012 त बंद जालो. त्या वेळार गोंयांत भाजपाचें जाल्यार केंद्रांत काँग्रेसीचें सरकार आशिल्लें. 2014 त सर्वोच्च न्यायालयान खण बंदी काडटना वर्सुकी म्हाल काडपाच्या प्रमाणाचेर निर्बंध घातले. तशेंच बेकायदा खण भानगडीची चवकशी करपाचे आदेश राज्य सरकाराक दिले. हाचे उपरांत खण भानगडीच्या तपासा खातीर सरकारान खासा तपास पंगड (एसआयटी) स्थापन केलो. या तपास पंगडान तपास करतना कांय खण धनी तशेंच अधिकाऱ्यांची चवकशी केली. कांय जाणाक अटक लेगीत जाली. आदले मुख्यमंत्री दिगंबर कामत हांची लेगीत चवकशी जाली. बेकायदा खण भानगडीक लागून गोंयाक 35 हजार कोटींचें लुकसाण जाल्ल्याचो आरोप शहा आयोगान अहवालांत केल्लो.

ह्या अहवालाचेर आदारीत एसआयटीन तपासाक सुरवात केली. लिजांचो 50 वर्सांचो कालावधी सोंपल्या उपरांत कंडोनेशन ऑफ डिलेचो लाव दिवन लिजांचें नूतनीकरण केलें. हो गैरवेव्हार आशिल्ल्याचो ठपको दवरून एसआयटीन आरोपपत्र दाखल केलें. जानेवारी 2018 त दाखल जाल्ल्या या आरोपपत्राचेर कांय तेंप सुनावण्यो लेगीत जाल्यो. आतां आरोपांतल्यान दिगंबर कामत आनी हेर सोळा जाणांची निर्दोश सुटका जाल्या. या प्रकरणांत खण धनी रवींद्र प्रकाश हांची लेगीत सुटका जाल्या.