भांगरभूंय | प्रतिनिधी
मडगांव : ब्रिटिश बॅगपॅकर डॅनियली मॅकलॉग्लीन हिचेर लैंगीक अत्याचार करून खून केल्ल्या प्रकरणांत दुबावीत विकट भगत हाका न्यायालयान दोशी थारायला. ताका सोमारा 17 फेब्रुवारीक ख्यास्त फर्मायतले. मडगांवच्या दक्षीण गोंय सत्र न्यायालयांत डॅनियली मॅकलॉग्लीन हिच्या खून प्रकरणांतलो खटलो चालू आसा. ह्या प्रकरणांत दोनूय बाजूंचो युक्तीवाद पुराय जाले उपरांत शुक्रारा निवाडो दिलो. ह्या प्रकरणांत 46 साक्षीदारांचे जबाब नोंद केल्यात.
काणकोणां राजबाग आगोंदा 13 मार्च 2017 ह्या दिसा डॅनियलीचो खून जाल्लो. खुना आदीं तिचेर लैंगीक अत्याचार जाल्ल्याचेंय वैजकी अहवालांतल्यान स्पश्ट जाल्लें. काणकोण पुलिसांनी ह्या प्रकरणांत तपास केल्लो. तेन्नाचे पुलीस निरिक्षक राजेंद्र प्रभुदेसाय हांणी ह्या खुनाचो तपास करून काणकोणच्या भगतवाड्या वयलो दुबावीत विकट भगत हाका अटक केल्ली. त्या वेळार ताची पिराय 24 वर्सां आशिल्ली. विकट आनी डॅनियली हांचे मदीं इश्टागत आशिल्ली आनी खुना परांत डॅनियलीचो मोबायल लेगीत चोरयेक गेल्लो. तिच्या आंगाचेर 7 घावे आशिल्ले.
ह्या प्रकरणांत दुबावीत विकटाची बंदखणींतली वागणूक बरी नाशिल्ल्यान बेडयो घालून सुनावणेक हाडपाचो आदेश हे आदीं न्यायालयान कडल्यान दिल्लो. व्हिडीओ कॉन्फरन्सिंगाचेर ही सुनावणी सुरू आशिल्ली, मात शुक्रारचे सुनावणेक दुबावीत विकट हाका प्रत्यक्ष हाजीर करपाक सांगिल्ल्यान ताका न्यायालयांत हाजीर केल्लो.
काणकोण पुलिसांन विकटाचेर न्यायालयांत वट्ट 374 पानांचें आरोपपत्र दाखल केल्लें आनी ताचेर खून करप, लैंगीक अत्याचार करप, चोरी तशेंच पुरावो नश्ट करपाचो यत्न ह्या कलमां खाला गुन्यांव नोंद केला. सरकारी पक्षाच्या वकिलान ह्या खटल्याची सुनावणी जलदगतीन करची अशी मागणी केल्ली. हे फाटभुंयेर सुनावणेक गती दिल्ली.
न्यायालयांतले सुनावणे उपरांत अॅड. अरूण ब्राझ डिसा हांणी दिल्ले म्हायती प्रमाण, दुबावीत विकट भगत हाका न्यायालया कडल्यान लैंगीक अत्याचर करप, खून करप आनी पुरावे नश्ट करपाचो यत्न करप, अश्या आरोपां खाला दोशी थारायला.
अॅड. विक्रम वर्मा हांणी सांगलें, दुबावीत विकट भगत हाचे वयले गुन्यांव न्यायालयांत सिद्ध जाल्ल्यान ताका दोशी थारायला. ख्यास्त 17 फेब्रुवारीक फर्मावपाची आशिल्ल्यान त्या वेळार हेर म्हायती मेळटली. दुबाविताक चडांत चड ख्यास्त जावची अशी मागणी केल्या. ताचे ख्यास्ती संबंदांत न्यायालया कडल्यान निर्णय घेतले, अशेंय तांणी सांगलें. दुबावीत विकट भगत हाका न्यायालया कडल्यान दोशी थारायले उपरांत डॅनियल हिच्या घरच्यांनी 8 वर्सांच्या न्यायालयीन लड्या उपरांत दुबाविताक दोशी थारायिल्ल्यान न्यायालयाचे उपकार मानले. डॅनियलीच्या मरणाक लागून कुटुंबाचें व्हड लुकसाण जालें, अशें सांगतना तिच्या घरच्यांच्या दोळ्यांतल्यान दुकां व्हांवतालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
