भांगरभूंय | प्रतिनिधी
म्हापशें, प्रतिनिधी ः म्हापशेंची नगराध्यक्ष डॉ. नूतन बिचोलकार हांणी सत्ताधारी गटांतले कबलाती प्रमाण पदाचो राजिनामो दिलो. आतां प्रिया मिशाळ हांकां नगराध्यक्षपद घेवपाची शक्यताय आसा.
शुक्रारा 14 तारखेर सकाळीं उपसभापती जोशुआ डिसोझा हांची तांचे घरां भेट घेतले उपरांत तांच्या सल्ल्या प्रमाण डॉ. नूतन बिचोलकार हांणी नगरपालिका संचालनालया कडेन आपलो नगराध्यक्षपदाचो राजिनामो सादर केलो.
23 फेब्रुवारी 2024 दिसा डॉ. बिचोलकार नगराध्यक्ष पदाचेर विरोधा विणें वेंचून आयिल्ली. सत्ताधारी गटांत नगराध्यक्ष आनी उपनगराध्यक्ष हांचीं पदां विभागून घेवपाची अलिखीत कबलात जाल्ली. ते प्रमाण बिचोलकार हांची एक वर्सा खातीर ह्या पदाचेर निवड जाल्ली.
जानेवारीचे सुरवेक उपसभापती जोशुआ डिसोझा हांचे कडेन सत्ताधारी गटाची बसका जाल्ली. त्या वेळार चडशा नगरसेवकांनी डॉ. बिचोलकार हांच्या वागणुकेचेर नाराजगी उक्तायली. नगराध्यक्ष आनी नगरसेवक हांचे मदीं सकारात्मक संवाद जावंक नाशिल्ल्यान पालिका मंडळाच्या बसकांनी वैचारीक वादविवाद जावपाक लागले. हाका लागून जानेवारीच्या निमाणे मेरेन नगराध्यक्षपदाचो राजिनामो दिवपाची सुचोवणी डॉ. बिचोलकार हांकां उपसभापती हांणी दिल्ली.
इतलेंच न्हय तर कंत्राटी नोकर भरती आनी अलंकार थेटर लागसारची दोन दुकानां एकूच आशिल्ल्याचें सांगून ह्या दुकानांचें कबलात पत्र नूतनीकरण करपाच्या बेकायदो प्रकरणावेल्यान पालिका मंडळाच्या सत्ताधारी गटांत मतभेद निर्माण जाल्ले. देखून पालिका मंडळाच्यो सेगीत तीन बसका फुडें धुकलपाची पाळी नगराध्यक्षांचेर आयली. जाल्यार चवथे बसकेंत 20 तल्या 14 नगरसेवकांनी बहिश्कार घालो. ताका लागून पालिका मंडळा भितरले मतभेद मुखार आयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
