भांगरभूंय | प्रतिनिधी
येजमान भारत पंगडान हांगाच्या नरेंद्र मोदी स्टेडियमाचेर जाल्ले तिसरे वन डेंत व्हड जैत जोडून तीन मॅचींचे माळेंत इंग्लंडाचो 3-0 असो धूप केलो. भारतान 142 धांवड्यांनी जैत जोडलें. भारतान सगल्यो विकेटी व्हगडावन 356 धांवड्यो केल्यो आनी उपरांत इंग्लंडाचो डाव 34.2 ओव्हरींनी 214 धांवड्यांचेर डाव सोंपयलो.
शुभमन गील भारताच्या जैताचो नायक थारलो. ताणें कारकिर्दींतलो सातवो शेंकडो मारून भारताक व्हड धांवसंख्या उबारून दिवपाक हातभार लायलो. मोखीचो फाटलाव करपी इंग्लंडान जलद रितीन सुरवात केली. पूण, भारताच्या बॉलरांनी सांघीक प्रदर्शन करून इंग्लंडाक जैता पसून पयस दवरलो.
इंग्लंडाचो मुखेली जोस बटलरान सेगीत तिसरे खेपे टॉस जिखलो आनी हे खेपे पयलीं फिल्डींग करपाचो निर्णय घेतलो. हे खेपे लेगीत भारताचो मुखेली रोहीत शर्माक जाय तोच निर्णय बटलरान घेतलो. पूण, फाटले मॅचींत शेंकड्याची खेळी करपी रोहीत शर्मा दुसरे ओव्हरीच्या पयल्या बॉलाचेर वुडाचो शिकार थारलो.
पयल्या दोनूय मॅचींनी अर्द शेंकड्यांची खेळी करपी शुभमन गील हे मॅचींत लेगीत फॉर्मांत दिसलो. पूण, सगल्यांची नदर विराट कोहलीचेर आशिल्ली. कोहलीन सुरवातीक सादूरतायेन खेळ केलो. ल्हवल्हव ताणें खेळपट्टीचेर तग धरलो. ताणें आनी गील हाणें आपले अर्द शेंकडे पुर्ण केले. पूण, कोहली अर्द शेंकडो पुर्ण केल्या उपरांत रोखडोच परतून एकदा आदिल राशिदाचो शिकार थारलो. कटकांत लेगीत आदिलानूच ताका बाद केल्लो.
पयले मॅचींत जबरदस्त प्रदर्शन करपी श्रेयस अय्यरान कालचे मॅचींतूय फॉर्मांत दिसलो. ताणें आयल्या उपरांत आक्रमक शैलींत बॅटींग करपाक सुरवात केली. गील आनी अय्यर हांणी भारताचो स्कोर 200च्या वयर व्हेलो. शेंकडो पूर्ण केल्या उपरांत गील रोखडोच बाद जालो. गील बाद जाल्या उपरांत अय्यर लेगीत बाद जालो. लोकेश राहुल परतून पांचवे सुवातेर बॅटिंगेक आयलो. भारताच्यो थारावीक अंतरान विकेटी पडत गेल्यो. पयल्या पांचांतल्यो चार विकेटी राशिदान घेतल्यो. पयल्या दोन मॅचींनी अपेशी थारिल्ल्या राहुलान 40 धांवड्यांची खेळी केली. भारताचो डाव निमाण्या बॉलाचेर सोंपलो. अशें तरेन इंग्लंडाक जैता खातीर 356 धांवड्यांची मोख मेळ्ळी.
इंग्लंडाच्या ओपनरांनी ताबडतोड पद्दतीन बॅटींग करून भारताच्या बॉलरांक बॅकफुटाचेर धुकल्ले. पयल्या स ओव्हरींनी इंग्लंडान 60 धांवड्यो केल्यो. माळेंतली पयली मॅच खेळपी अर्शदीप सिंगान सावकाश गतीच्या बॉलाचेर बेन डकेटाक बाद केलो. रोहीत शर्मान ताची कॅच धरली. फिल सॉल्ट लेगीत अर्शदीपाचो शिकार थारलो. जेमी आवर्टनाचे सुवातेर खेळपी टॉम बॅण्टन आनी जो रुट हांणी डाव सांबाळपाक सुरवात केली. पूण, कुलदीप यादवान पयलीं बॅण्टनाक तंबूंत धाडलो. ते उपरांत अक्षर पटेलान रुटाक बाद केलो. पयल्या स्पेलांत म्हारग थारिल्ल्या हर्षित राणान पुनरागमन करतना जोस बटलर आनी हॅरी ब्रूक हांकां बाद करून इंग्लंडाची जैताची आस्त सोंपयली. उरिल्ल्यो विकेटी हार्दिक पांड्या आनी वॉशिंग्टन सुंदर हाणें घेतल्यो. भारताच्या सगल्या बॉलरांनी विकेटी घेतल्यो.
चॅम्पियन्स ट्रॉफी पयलीं भारताची ही निमाणी मॅच आशिल्ली. हे माळेंत ऋषभ पंताक सोडून हेर सगल्यांक खेळपाची संद मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
