भांगरभूंय | प्रतिनिधी
दाबोळी बोगमाळो चौकांत कंत्राटदाराचीं घाळपणां
भांगरभूंय । प्रतिनिधी
मुरगांव : दाबोळी बोगमाळो चौकांत उड्डाण पुलाच्या खांब्या खातीर खणिल्ल्या एका व्हड फोंडकुलांत बुधवारा 12 फेब्रुवारीक सकाळी एक टुरिस्ट टॅक्सी पडली. खणटना थंयचो रस्तो गाडयां खातीर योग्य तरेन बंद करूंक नाशिल्ल्यान ही घडणूक घडली अश्यो प्रतिक्रिया व्यक्त जातात. उड्डाण पुलाचें बांदकाम करतना थंय योग्य खबरदारी घेवपाची गरज आसता, पूण कंत्राटदार, कंपनीचे अधिकारी आनी कामगार पुराय तरेन आडनदर करतात. हे खातीर वाहनचालक आनी लोकां मदीं तिडक आसा.
योग्य तरेन बॅरिकेट्स लावंक नाशिल्ल्यान बुधवारा ती टुरिस्ट टॅक्सी उड्डाण पुलाच्या फोंडकुलांत पडली. सुदैवान टॅक्सी चालकाक दुखापत जावंक ना. तो दाबोळी विमानतळा वयल्यान एमईएस चौका वटेन वतालो. अर्द्या अदीक रस्त्याचेर बॅरिकेट्स घातल्यात. पूण जंय फोंडकूल खणला, थंयचो भाग उक्तो आसा. थंय फकत ‘ट्रॅफीक कोन’ दवरल्यात. ते चालकांच्या लक्षांत येनात. ताका लागून चालक आपल्यो गाडयो थेट त्या रस्त्यान व्हरपाची भिरांत आशिल्ली, ती बुधवारा खरी थारली. बॅरिकेट्स घातिल्ल्यान रस्तो खुबूच अशीर जाला. चालकांक कच्च्या रस्त्या वयल्यान गाडयो चलोवच्यो पडटात. ह्या रस्त्याचेर उदक शिंपडचे बदला, ओत्तात. ताका लागून थंय चिखल जाता आनी गाडी चलोवपाक खुबूच घातक थारता. प्रशासनान आनी कंत्राटदारान तातूंत लक्ष घालचें, अशी मागणी तिडकल्ल्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
