बऱ्या प्रकल्पांक विरोध ही घातक प्रवृत्ती

भांगरभूंय | प्रतिनिधी

मुख्यमंत्री : मयां 50 कोटींच्या उदरगत येवजण्यांक सुरवात

भांगरभूंय । प्रतिनिधी

दिवचल : भाजपाक लागुनूच आयज मयेकारांक पुराय स्वातंत्र्य मेळटना साबार सुविधा मेळ्ळ्यात, मालकी हक्क फावो जाल्यात. सरकारी जमनीचेर दर्जेदार प्रकल्प येतात जाल्यार ताका विरोध करपाची प्रवृत्ती घातक आसा, फुडले पिळगेच्या उत्कर्शाक आडखळ हाडपी आसा. ते खातीर गांवच्या हिता खातीर बऱ्या प्रकल्पांक गांवच्या लोकांनी आदर करचो. मानवी उदरगती खातीर बरे प्रकल्प म्हत्वाचे आसात, अशें मुख्यमंत्री डॉ. प्रमोद सावंत हांणी सांगलें.

मयें मतदारसंघांत कृशी मळार, वीज मळार, पर्यटन मळार तशेंच सर्वांगी उदरगत अश्या मळांचेर सुमार 50 कोटी रुपया खर्च करून पांच उदरगत येवजण्यांक चालना दितले. ह्या कामांचो डिजिटल पद्दतीन बुन्यादी फातर बसयले उपरांत मुख्यमंत्री उलयताले. ही कार्यावळ मयें पंचायत सभाघरांत आयोजीत केल्ली. ह्या वेळार आमदार प्रेमेंद्र शेट, सरपंच कृष्णा चोडणकार, जिल्हो पंचायत अध्यक्ष शंकर चोडणकार, महेश सावंत, उत्तर गोंय भाजप अध्यक्ष दयानंद कारबोटकार, मंडळ समिती पदाधिकारी, विवीध पंचायतीचे सरपंच, पंच, भाजप पदाधिकारी, थळावे लोक तशेंच कार्यकर्ते हाजीर आशिल्ले.

मयें मतदारसंघ हो ग्रामीण मतदारसंघ आसलो तरी थंयची हरीत क्रांती, पाचवोचार सैम संवसाराक खुणायता. ताका लागून शेती, बागायती, दूद उत्पादन मळांचेर नवे पिळगेन ह्या वाठारांत परंपरीक शेतीक आदली गिरेस्तकाय मेळोवन दिवचे खातीर यत्न करचे. सरकार ह्या वावरांत पुराय आदार दिवपाक बांदील आसा, अशें मुख्यमंत्र्यान सांगलें.

पर्यटन थळ म्हूण संवसारीक नकाश्याचेर पाविल्ल्या मयाक नवी दिशा दिवचे खातीर आनी नवे पिळगेच्या फुडारा खातीर मयें गांवांत सरकारी जमनीर आंतरराष्ट्रीय दर्जाचें कायदो म्हाविद्यालय आनी हेर प्रकल्प चालीक लावपाचो सरकाराचो संकल्प आसा. थळाव्या लोकांनी हाका आदार केलो ना जाल्यार गांवची उदरगत जातली तरी कशी, असो प्रस्न मुख्यमंत्र्यान उपस्थीत केलो.

मयेंकारांक खरें स्वातंत्र्य दिवचे खातीर भाजपाचें डबल इंजीन सरकार सेगीत वावुरता. कायदेशीर प्रक्रिया पुराय केल्ल्यांक समदी दिल्यात, शेती आनी हेर गजालीं विशींच्योय सनदी मेळटल्यो. नव्या प्रकल्पाच्या माध्यमांतल्यान दर्जेदार शिक्षम आनी संवसारीक पांवड्याचेर उड्डाण घेवपाची संद युवा पिळगेक मेळटली. ताका लागून विरोध करपाची मनोवृत्ती सोडात आनी सरकाराचे उदरगत प्रक्रियेक आदार करात, गांवचें हीत मतींत घेयात, असो उलो मुख्यमंत्र्यान मारलो.

पाचवोचार सैम आनी नितळ हवे खातीर संवसारभरांतलो लोक गोंया कडेन आकर्शीत जातात. तें गोंय पाचवेचार दवरचे खातीर सगळ्यांनीच योगदान दिवप गरजेचें आसा, अशें मुख्यमंत्री डॉ. सावंत हांणी सांगलें.

दरेका मतदारसंघांत 500 कोटीं परस अदीक उदरगतीच्यो येवजण्यो डबल इंजीन सरकारान चालीक लायल्यात. ताका लागून बऱ्या गजालींक लोकांचो आदार अपेक्षीत आसा. आदार केलो जाल्यार बरे प्रकल्प हाडून दरेका दरेका मतदारसंघाचें रुपरंग बदलप शक्य आसा, अशें मुख्यंत्र्यान स्पश्ट केलें. ह्या वेळार तांणी आमदार प्रेमेंद्र शेट हांच्या फलोत्पादन म्हामंडळाचे कामगिरीची तशेंच मतदारसंघात सेगीत फाटपुरवण करून आतां मेरेन 200 प्रकल्प चालीक लावपाक येसस्वी जाल्ले खातीर शेट हांकां परबीं दिली.

भुंयगत वीज केबल तशेंच शिंपणावळीची सुविधा, पर्यटन उदरगत तशेंच कृशी संस्कृतीक चालना दिवचे खातीर वेगवेगळे उपक्रम हातांत घेतल्यात. नार्वें, विठ्ठलापूर वाठारांत उत्कृश्ठ पर्यटन प्रकल्प, मयां तळ्याचेर दर्जेदार पर्यटन सुविधा अश्या येवजण्यांच्या माध्यमांतल्यान उदरगतीक व्हड चालना मेळटली. ह्या वावरांत मुख्यमंत्र्यांनी पुराय आदार दिल्ल्यान तें शक्य जालां, अशें आमदार प्रेमेंद्र शेट हांणी स्पश्ट केलें.

विश्वास चोडणकार हांणी येवकार दिलो. तांणी विवीध प्रकल्पांची म्हायती दिली.

‘काँग्रेस, गोवा फॉरवर्डा पासून सादूर’

काँग्रेस तशेंच गोवा फॉरवर्ड हे गरजे भायर राजकारण करून दिशाभूल करतात. तांचे पासून सादूर रावात, अशी शिटकावणी मुख्यमंत्र्यान दिली. तशेंच गोवा फॉरवर्ड आनी काँग्रेस हांणी कसले दिवे लायल्यात, हें सगळ्यांक खबर आसा, अशी टिका तांणी दिली.