भांगरभूंय | प्रतिनिधी
पणजी ः तृणमूल काँग्रेस फुडली जिल्लो पंचायत आनी विधानसभा वेंचणूक लढयतलो. हे खातीर आमी काम पसून सुरू केलां. आमचो पक्ष गोंय सोडटा ही फक्त एक वावडी, अशें पक्षाचे राष्ट्रीय म्हणयारे ट्रोजन डिमेलो हांणी सांगलें. बुधवारा पणजे घेतिल्ले पत्रकार परिषदेंत ते उलयताले. ह्या वेळार पक्षाचे सह संयोजक मारीयानो रॉड्रिग्ज हाजीर आशिल्ले.
तृणमूल काँग्रेस गोंयांतल्यान भायर सरतली अशी वावडी उडल्या. हातूंत तथ्य ना. फाटले विधानसभा वेंचणुकेंत आमकां उणो वेळ मेळिल्लो. अशें आसून लेगीत आमकां ८ टक्के मतां मेळिल्ली. तेन्ना सावन आमची तयारी सुरू आसा. आमी जिल्लो पंचायत तशेंच येवपी विधानसभा वेंचणूक लढयतले. गोंयांतल्या युती संबंदी आमचे राष्ट्रीय फुडारी निर्णय घेतले अशें ट्रोजन हांणी सांगलें.
गोंयांत पक्षाचे आमदार वा खासदार नात. तरी लेगीत आमचो खासदार डेरीक ओ ब्रायन हांणी गोंयच्या रापणकारांचो प्रस्न राज्यसभेंत मांडलो. हाचे आदीं तांणी वेळसांवच्या नुस्तेकारांक मेळून तांची समस्या समजून घेतिल्ली. गोंयांतल्या भाजपा आनी काँग्रेस खासदारांनी जें केलें ना तें तृणमूल काँग्रेस खासदारांनी केलें. हाचें फुडें आमचो पक्ष गोंयांतलें शेतकार, नुस्तेकार आनी हेर पारंपरीक वेवसायिकांच्यो समस्या समजून घेतलो अशें रॉड्रिग्ज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
