भांगरभूंय | प्रतिनिधी
नवी दिल्ली, खबरां संस्था ः ट्रान्सपरन्सी इंटरनॅशनल कंपनीन 11 फेब्रुवारीक 180 देशांचो भ्रश्टाचार अहवाल जाहीर केला. भारताची क्रमवारी देंवल्या. 2024 वर्साचे वळेरेंत तीन सुवाती देंवून 96वे सुवातेर पावलां. भारताचो क्रमांक 2023 वर्सा 93वे सुवातेर आशिल्लो. हाचो अर्थ आतां हांगा भ्रश्टाचार वाडला. प्रकाशीत केल्ले क्रमवारींत पयल्या क्रमांकाच्या देशांत सगळ्यांत उणो भ्रश्टाचार आनी 180 व्या क्रमांकाचेर आशिल्ल्या देशांत सगळ्यांत चड भ्रश्टाचार आसा.
शेजारचो देश चीन 76वे सुवातेर आसा. फाटल्या 2 वर्सां सावन ताच्या क्रमवारींत कसलोच बदल जावंक ना. तेच बरोबर पाकिस्तानांतूय भ्रश्टाचार वाडला. 133वे सुवातीवेल्यान 135व्या क्रमांकाचेर पावला. श्रीलंका 121वे आनी बांगलादेश 149वे सुवातेर आसा.
डेन्मार्क पयल्या क्रमांकाचेर कायम उरलां. थंय सगळ्यांत उणो भ्रश्टाचार आसा. फिनलंड दुसरे आनी सिंगापूर तिसरे सुवातेर आसा. दक्षीण सुदान 180 वें सुवातेर आसा जंय सगळ्यांत चड भ्रश्टाचार आसा.
मंगळारा जाहीर केल्ल्या अहवालांत भारताचो स्कोअर 38 निश्चित केलां. 2023 वर्सा हो निश्चित स्कोअर 39 आनी 2022 वर्सा 40 आशिल्लो. फक्त एक क्रमांक वगडायल्ल्यान भारत 3 सुवातींन देंवलो. फाटलीं कांय वर्सां संवसारीक सरासरी 43 उरल्या. दोन तृतियांशा परस चड देशांनी 50 गुणां परस उणे गूण मेळयले.
ह्या निर्देशांका खातीर ट्रान्सपरेन्सी इंटरनॅशनलचे तज्ञ दरेका देशाच्या भौशीक क्षेत्रांतल्या भ्रश्टाचाराचें मुल्यांकन करतात. उपरांत दर एका देशाक 0 ते 100 मदले गूण दितात. देशांत भ्रश्टाचाराची पातळी जितली चड आसता तितलोच ताका गूण उणो मेळटा. ह्या आदाराचेर निर्देशांकांतली क्रमवारी थारायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
