कृशी मळाक अमृतकाळ?

भांगरभूंय | प्रतिनिधी

हालींच्या तेंपार शेत म्हालाक बरें मोल मेळटा. पूण, शेत पिकोवपाक कश्ट करचे पडटात नेमके ते करपाची आतां कोणाची तयारी ना.

शेतवडीचें रुपांतर करप हाचे मुखार कठीण न्हय, तर अशक्य थारतलें, अशें मुख्यमंत्र्यान काल सांगलें. गोंय अमृतकाळ शेतकी धोरण चालीक लागलां. खाजन, मरड धरून सगल्याच शेतांचें रुपांतर करपाक आतां मेळचेंना. येवकार. फक्त शेतवडूच कित्याक, दोंगुल्ल्यां वयली जमीन पसून सैमा खातीर राखून दवरुंया. आतां राज्यांत चड जमीन उरूंक नासतली. म्हणटकच शेतकी मळाक वरदान थारपी हो निर्णय चालीक लावपाक सरकारी यंत्रणेक चड जड वच्चें ना.
महाराष्ट्र, कर्नाटक, पंजाब, उत्तर प्रदेशांत शेतकार आसात, तशें गोंयांत नात. आंवाठ उणो आशिल्ल्यान शेतवडूय चड ना. 2007 त गोंयांत 197 हॅक्टरां मेरेन ती आशिल्ली. 2022 त ती 141 हॅक्टरांचेर पावली. हातूंत काजू, बागायती, भाजिपाल्याचीं पोरसां, माडांचोय आस्पाव आसतलो. पोरणें गोंयच्या शेतकी संशोधन केंद्रान 2021 त “आमचें गोंय, आत्मनिर्भर गोंय” हो व्हिजन डाॅक्युमेंट तयार केल्लो. तातूंत शेतवड आनी ते संबंदीच्या मळांची उदरगत करपाक विवीध उपाय, येवजण्यो सांगिल्ल्यो. भितर पेरणीं केल्लो वाठार 131.2 हॅक्टर दाखयला. इबाडिल्ली जमीन 1076.15 हॅक्टर. तरातरांचे सर्व्हे, दस्तावेज, येवजण्यो तयार जातात. पूण तातूंत दवरिल्ली मोख पुराय जाता काय ना, हाचोय एक सर्व्हे करून ताचो दस्तावेज उजवाडाक हाडूंक फावो. हालींच्या तेंपार शेत म्हालाक बरें मोल मेळटा. पूण, शेत पिकोवपाक कश्ट करचे पडटात. नेमके ते करपाची आतां कोणाची तयारी ना. शेतकार, बागायतदार घराण्यांच्या नव्या पिळग्यां मदींय ती दिसताच अशें ना. तातूंत उच्च शिक्षण घेतिल्ल्यांक हात मातयेंत म्हेळे करपाची गरजूय ना. हेर मळांचेर उण्या जाल्ल्या गोंयकारांचो जागो भायल्यांनी घेतलो, तसो शेतकी मळाचेर तो घेवंक ना. पूण, ती जमीन गोंयकारांनी भायल्यांक विकल्या. थंय बंगले, इमारती उब्यो रावल्यात. देखूनच शेतवडीची जमीन विकपाचेर खर निर्बंध घालपाचें सरकारान थारायलां.
स्वराज्य संस्था, आप मजत गट तशेंच हेरां कडल्यान आयिल्ल्या साडेतीन हजार सुचोवण्याचेर आदारून हें 10 वर्सां खातीरचें अमृतकाळ शेतकी धोरण तयार केलां. तें चालीक लागता काय ना, ताचेर सरकारी अधिकारी अहवाल दितले. ते प्रमाण सरकार फुडलीं पावलां उबारतलें. गोंयांत सरकारा कडेन नोंद जाल्ले 52 हजार शेतकार आसात. मात तातूंतल्या फक्त 17 हजार शेतकारां कडेनूच किसान कार्ड आसा. उरिल्ल्या शेतकारांनी तें कित्याक करूंक ना, ताची चवकशी करपाची गरज आसा. आधारकार्ड रेशनकार्डाक जोडिना जाल्यार रेशन मेळचें ना, तशें ह्या कार्डाचे बाबतींत जाल्यार बरें न्हय? ह्या कार्डाक लागून शेतकारांक सगल्या सरकारी येवजण्यांचो लाव कसल्याच अडचणी बगर रोखडोच मेळटा. कार्डाचो आयडी शेतकाराचे जमनीचे नोंदी कडेन जोडिल्लो आसता. तांकां शेतवडी संबंदी विविध म्हायती, रीण, अनुदान मेळटा. इतले फायदे आसतना ह्या 35 हजार शेतकारांनी कित्याक कृशी कार्ड करुंक ना तें कळना?
कुळां, मुंडकारांच्या नांवाचेर कितल्यो जमनी आसात? त्यो तांच्या नांवाचेर जाल्यात? फाटीं पेडणें वाठारांतल्या कूळ, मुंडकारांचे प्रस्न सोडोवपाक, तांच्यो केशी लढोवपाक वकील दिवपाची घोशणा आमदार जीत आरोलकार हांणी केल्ली. पूण, भोवतेक मुंडकार न्यायालयांतूच येनात, अशें तांणी सांगलें. भाटकार आपल्या जाग्यांतल्यान मुंडकारांक धांवडावन त्यो जमनी विकत सुटल्यात. जमनीच्या रुपांतराक आपलो खर विरोध आसतलो अशेंय तांणी सांगलें. नगर नियोजन खातें, कृशी खातें, येणावळ खातें हांणी मेळून गोंयांत शेतवडीच्यो (भाटां, पोरसां, शेतां, फार्मां….) जमनी कितल्यो उरल्यांत, ताचो आंकडो जाहीर केल्यार गोंयच्या शेतकी मळाचें चित्र स्पश्ट जातलें. मागीर उपाय घेवपूय सोंपें जातलें.
शेतकारांक मानायांची पुरवण करपाक यंत्रणा उबारल्यार बरी. कारण सध्या मेळटात ते मानाय शेतकारांक परवडनात. ताका लागून लोकांनी भात रोंवपूच सोंडलां. शेतकारांक, बागायतदारांक उपद्रवी जनावरां पसून राखण मेळपाक जाय. बाजारपेठ सगल्यांत म्हत्वाची. गोंयकारांनी पिकयिल्लो भाजिपालो फळ उत्पादन म्हामंडळ घेता. हेर वेपारी संघटणांचोय तेंको मेळपाक जाय. शेतकारांक बेगीन अनुदान, मजत मेळची म्हूण फास्ट ट्रॅकाक मान्यताय दिल्या. शेतकी खातें तुमच्या दारांत, ही कार्यावळ ते खातीर सुरू करूं येता. सगल्यांत पयलीं शेतजमनींचें रुपांतर बंद जावचें. तसो निर्णय घेतला, पूण तो चालीक लायतना खूब आडमेळीं येवंक शकतात. सेंद्रीय साऱ्याचो वापर वाडचो. शेतांनी खारें उदक घेवपाचे प्रकार वाडल्यात, ताकाय आळो बसचो. खाजनांनी शेती वाडोवपाचेर नियोजन केलां, अशें सरकारान म्हणलां. गोंयच्यो भाताच्यो जाती, फळां, फळभाजयो, भाजयो आशिल्ल्यो, तांचेर काळ आयला. अमृतकाळ म्हणल्यार कितें तरी नवें करपाक पवित्र दीस. हें शेतकी धोरण कृशी मळाक खऱ्या अर्थान अमृतकाळ थारचें.