भांगरभूंय | प्रतिनिधी
फोंडें: बेतोडें पंचायत वाठारांतल्या बोणबाग गांवांत परतून गव्यांनी खवदळ घालपाक सुरवात केल्या. फाटल्या ऑक्टोबर म्हयन्यांत घरा कुशीक येवपी गव्यान एके बायलेचेर हल्लो केल्ल्यान तिका मरण आयिल्लें. गव्याचो लोकवस्तींत प्रवेश वाडिल्ल्यान बोणबाग गांवांतल्या लोकांची न्हीद खळ्ळ्या. रान खात्यान गव्यांक धांवडावन घालपाची मागणी थळावे लोक करतात.
बोणबाग वाठारांत अदमाशेक सात ते आठ गव्यांचे कळप लोकवस्तींत प्रवेश करीत आसात. बोणबाग आनी दुर्गाभाटाचे शिमेर कोयर उडयत आशिल्ल्यान ताका लागून गवे दीसपट्टे येत आशिल्ल्याचो दुबाव उक्तायतात. ऑक्टोबर म्हयन्यांत गव्याच्या हल्ल्यात एके बायलेक मरण आयले उपरांत रान खात्यान दखल घेतिल्ली. रान खात्यान गव्यांक लोकवस्ती पसून पयस दवरपा खातीर लांब असो खड्डो खणिल्लो. पूण गवे दुसरे वटेन लोकवस्तींत प्रवेश करूंक लागिल्ल्यान थळाव्यांची न्हीद खळ्ळ्या. फाटल्या चार-पांच दिसा सावन कोयर खावपा खातीर गव्यांचे कळप लोकवस्तींत प्रवेश करीत आसात. शिमेर व्हड प्रमाणांत कोयर उडयत आशिल्ल्यान गवे थंय दिसून येतात.
मंगलदास गावडे हांणी दिल्ले म्हायती प्रमाण फाटल्या कांय दिसां सावन गवे खूबशा जाणांच्या घरा कुशीक येत आसात. ऑक्टोबर म्हयन्यांत गव्याच्या हल्ल्यात एके बायलेक मरण आयिल्ल्यान लोकां मदीं भिरांत पातळ्ळ्या. वाठारांत उडयतात त्या कोयरांत पेड्डेर जाल्ली भाजी खावपा खातीर गवे येत आसात. ताका लागून एखादी दुखेस्त घडणूक परतून घडपाची शक्यताय आसा. रान खात्यान हाची दखल घेवन गव्याक धांवडावन घालपाची गरज आशिल्ल्याचें तांणी सांगलें.
सदानंद गावडे हांणी सांगलें, बोणबाग गांवांतले बायलेक गव्याच्या हल्ल्यात मरण आयिल्ल्यान आनी गवे परतून दिसूंक लागिल्ल्यान लोकां मदीं भिरांत पातळ्ळ्या. रान खात्यान हाची दखल घेवन लोकवस्तींत प्रवेश करपी गव्यांक धांवडावन घालपाची गरज आसा. नाजाल्यार गांवांत परतून दुखेस्त घडणूक घडपाची शक्यताय आशिल्ल्याचें सांगलें.
बोणबागचे संतोष आत्मा गावडे हांच्या घरा कुशीक फाटल्या कांय दिसां सावन गवो येत आशिल्ल्यान कुटुंबाची धांदळ जाल्या. गव्याचे भिरांतीन गावडे कुटुंब रातच्या वेळार घरा भायर सरनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
