भांगरभूंय | प्रतिनिधी
पणजी : राज्यांतल्या सगल्या उद्देगीक वसणुकांनी 100 कोटी रुपया खर्च करून मुळाव्यो सुविधा तयार जातल्यो. आयडीसी मंडळाचे बसकेंत हो निर्णय जालो. उद्देग मंत्री मॉवीन गुदिन्हो हांच्या फुडारपणा खाला आयडीसी मंडळाची बसका जाली. आयडीसीचे अध्यक्ष अालेक्स रेजिनाल्ड आनी हेर अधिकारी बसकेक हाजीर आशिल्ले.
उद्देगीक वसणुकांनी मुळाव्यो सुविधो पोरण्यो जाल्यात. तातूंत सुदारणा करपाची गरज आसा. रस्त्यांची दुरुस्ती करपा सयत नवे रस्ते तयार जातले. कोयर एकठांय करपा सयत कोयराचो सांठो करपा खातीर सुवातो निश्चीत जातल्यो. उद्देगीक वसणुकांनी कोयर एकठांय करप वा कोयर वेवस्थापना खातीर यंत्रणा ना. ही यंत्रणा तयार जातली. पियेवपाच्या उदका सयत हेर सुविधा तयार जातल्यो. रासायनीक वा दुशीत उदकाचे प्रकल्प (ईटीपी) तयार जातले. ईटीपी नाशिल्ल्या कारणान घाणयाऱ्या आनी रासायनीक उदकाचो विलो लावपाची समस्या आसा. ही समस्या पयस जातली, अशी म्हायती आयडीसीचे अध्यक्ष अालेक्स रेजिनाल्ड हांणी दिली.
उद्देगीक वसणुकांनी खूबशे प्लॉट रिते आसात. कांय प्लॉटउद्देजकांनी घेतल्यात, पूण वापर करूंक ना. हे प्लॉट वापरांत हाडपाची प्रक्रिया जातली. गोंय चेंबर, गोंय ल्हान उद्देग संघटणा हांकां विस्वासांत घेवन ही प्रक्रिया जातली, अशें अध्यक्ष रेजिनाल्ड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
