भांगरभूंय | प्रतिनिधी
उदरनिर्वाहाच्या हमी खातीर शेतकरी कल्याण कायदो
पणजी : खाजन, मोरड, खेर शेतांचो सांबाळ करतना सगळे तरेच्या शेत जमनींचें रुपांतरण आतां अशक्य जातलें. शेतकारांनी उदरनिर्वाहाच्ची हमी निर्माण करपाच्या हेतान नवें गोंय शेतकरी कल्याण कायदो तयार करतले, अशें मुख्यमंत्री डॉ. प्रमोद सावंत हांणी सांगलें. शेत जमीन वा न्हंयो, व्हाळ, तळ्यांत प्रदुशीत उदक सोडल्यार बरोच व्हड अर्थीक दंड दितले अशेंय तांणी सांगलें.
मंत्रालयांत ‘गोंय राज्य अमृतकाल कृशी धोरण २०२५’चें उक्तावण मुख्यमंत्री डॉ. प्रमोद सावंत हांचे हस्तुकीं जालें. ह्या वेयार कृषी मंत्री रवी नायक, गोंय फलोत्पादन महामंडळाचे अध्यक्ष प्रेमेंद शेट, कृषी संचालक संदीप फळदेसाय आनी हेर अधिकारी हजर आशिल्ले. राज्यांत ५२ हजार नोंदणीकृत शेतकरी आसात. १७ हजार शेतकरां कडेन कृषी कार्ड आसा. कृषी धोरणा खातीर पंचायती, स्वयं साहाय्य गट तशेंच हेरां कडल्यान ३७५१ सुचवण्यो आयिल्ल्यो. ह्या सुचवण्यांचो विचार करून धा वर्सां खातीरचे सर्वसमावेशक अशा अमृतकाल कृषी धोरणाक सरकारान मान्यताय दिल्या. ह्या धोरणाची कार्यवाय सुरू जावपाची आशिल्ल्यान म्हयन्याच्या निमाणे कडेन संबंदीत विभागाचो उपसंचालक सरकाराक अहवाल सादर करतले.
कृषी धोरणांतले ठळक मुद्दे
शेतकारांक आधार आनी कल्याणा खातीर :
-शेतकारांचें कल्याण आनी मजुरांची पुरवण करपा खातीर यंत्रणां
-शेतकारांक बाजारपेठ, रीण, विमा सुरक्षा आनी उत्पन्न मेळोवन दिवप
-उत्पादन खर्च उणो करून मालाचें प्रमाण आनी दर्जो वाडोवप
-शेतकरी कल्याण निधी मंडळ स्थापन करप
-अनुदान तशेंच अर्थीक मजती खातीर फास्ट ट्रॅक मान्यताय
संतूलीत आनी नवनिर्मिती
-शेती आनी शेतीच्या स्टार्टअपांतल्यान अक्षय उर्जा निर्मिती
-हायड्रोपोनिक्स, एरोपोनीक्सच्या आधारार शेतीक उर्बा
-आधुनीक तंत्रज्ञानाचे मजतीन उत्पादन वाडोवप
-खाजन जमनीचेर शेती वाडोवपा खातीर नियोजन
-हवामान बदलाक तोंड दिवपा खातीर योग्य पद्धत
शेतीच्या संवर्धना खातीर
-नश्ट जावपी शेत जमनींचो साञबाळ करप
-उदकाच्या स्रोताचें वेवस्थापन आनी सांबाळ
-१ आनी १४ उतार्यांच्या आधाराचेर शेत जमीन रूपांतरणाक प्रतिबंद
-शेतांतल्या बांयच्या वेवसायीक वापराचेर नियंत्रण
कृषी पर्यटन आनी जोड वेवसाय
-कृषी पर्यटना खातीर खास विभाग. ४ हजार चौमी जमीन आशिल्ल्या शेतकारांक कृषी पर्यटन करपाची मुभा
-शेताच्या प्रात्यक्षिकां खातीर खास शेत जमनीची निवड
-आंबो, काजू सयत अवोकाडो, तोरींग, ग्रेपफ्रुटच्या लागवडीक आदार
शेतकरी शिक्षण आणि भागिदारी
-अभ्यासक्रमांत कृषी विशयाचो आसपाव
-शेतकरी म्हायती केंद्रांची स्थापना
-शेतीच्या पद्धती खातीर कुशळताय उदरगत कार्यावळ
-रान जनावरांचो उपद्रव उणो करपाक उपाय येवजण
-संशोधन आनी नवे पद्दती खातीर कृषी संशोधन संस्थांकडेन भागिदारी
जैवविविधताय आनी अर्थीक उदरगत
-काजू, आंबो, पोफळीची लागवड
-नारल्ल, काजू आनी आंबो विकास मंडळाची स्थापना
-कृषी दायज जपपा खातीर म्युझीयमाची स्थापना
जमीन सुधारणा आनी कायदेशीर तरतूद
-शेतकारांक सुरक्षित पोट चलोवपा खातीर शेतकरी कल्याण कायदो
-कोमुनिदाद, देवळां, इगर्जेच्या जमिनींसाठी अनुदान मेळटलें
-शेत जमीन/बांयों, व्हाळ प्रदूशीत उदक सोडपाचेर कारवाय
-नवी येवजण, नवी कायदे तयार करपाक समिती
अथीर्र्क सशक्तीकरण
-शेतकारांक बाजारपेठ उपलब्ध करप
-शेता खातीर सरकारी एजन्सी, खाजगी उद्देगांत समन्वय
-अर्थीक मजती खातीर नवीन अर्थीक मजत दिवपाच्यो पद्धती
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
