भांगरभूंय | प्रतिनिधी
नवी दिल्ली, खबरां संस्था ः प्रधानमंत्री नरेंद्र मोदी हांणी ‘परीक्षा पे चर्चा’ कार्यावळींत विद्यार्थ्यां कडेन संवाद सादलो. ह्या काळांत तांणी कांय कड्डणांक सुपरफूड अशें म्हणलें. कड्डणां (Millets) फकत भलायके खातीर बरें न्हय, तर पर्यावरणाकय फायदेशीर आसा. देखून तांचो आहारांत आस्पाव करून निरोगी जिणे पद्दत आपणावप ही एक बरी संवय जावंक शकता.
कड्डणां कित्याक म्हत्वाचीं?
प्रधानमंत्र्यांनी संवादांत ‘व्हड कड्डणां’ हें उतर वापरलें. व्हड कड्डणां म्हळ्यार बाजरी, नाचणी, ज्वारी सारकिल्ली कड्डणां. पुर्विल्ल्या काळासावन ह्या कड्डणांचो उपेग करतात. तातूंत पोशक तत्वां भरपूर आसतात आनी कुडीक खूब फायदेशीर आसतात. ते भायर हीं कड्डणां पिकोवप पर्यावरणाक अनुकूल आसता. देखूनच तांकां सुपरफूड म्हणटात.
कड्डणांचे भलायकेक फायदे
१. पोशण तत्वां भरपूर
बाजरींत प्रथिनां, तंतू, लोखण, कॅल्शियम, मॅग्नेशियम आनी अँटीऑक्सिडंट्स भरपूर प्रमाणांत आसतात. हाडां, स्नायू आनी पचन तंत्र घट करता. तशेंच कुडीक गरजेचें पोशण दिवन उर्जा वाडयता.
२. गोडेंमूता खातीर फायदेशीर
बाजरींचो ग्लायसीमिक इंडेक्स (GI) उणो आसता, देखून तातूंतल्यान रगतांतली साकर नेटान वाडना. गोडेंमूत आशिल्ल्या लोकां खातीर हो एक बरो पर्याय.
३. पचनक्रिया सुदारता
तातूंत तंतूचे प्रणाण चड आशिल्ल्यान पचनक्रिया सुदारता आनी बद्धकोष्ठतेची समस्या उणी जाता. तशेंच कुडीक डिटॉक्स करपाक मजत करता.
४. वजन उणें करपाक मजत करता
तंतूक लागून पोट भरिल्ले जाणवता, जाका लागून भूक उणी लागता आनी मोचसाण आडावपाक मजत जाता. वजन नियंत्रणांत दवरपा खातीर हो एक बरो पर्याय.
५. काळजाक फायदेशीर
कोलेस्टेरॉल नियंत्रणांत दवरून काळजाक फायदो जाता. ताका लागून बरें कोलेस्टेरॉल (एचडीएल) वाडोवपाक मजत करता, रगतदाब संतुलित दवरता.
६. ग्लूटेन-फ्री आनी ॲलर्जी पसून सुरक्षीत
गंव वा हेर कड्डणां कडेन ॲलर्जी आशिल्ल्या लोकां खातीर बाजरी हो एक बरो पर्याय आसा, कारण ते ग्लूटेन-फ्री आसतात.
७. पर्यावरणपूरक शेती
उदक, सारें, कीटकनाशक उणें वापरून बाजरी लागवड करूं येता. सुक्या हवामानांत लेगीत ताचें उत्पादन सहज जाता, ताका लागून तें पर्यावरणपूरक थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
