राजभाशा चालीक लावंक देवनागरी टायपिंग येवप गरजेचें – प्रो. भावे
भांगरभूंय | प्रतिनिधी
सरकारी कर्मचार्यां खातीर देवनागरी टायपिंग प्रशिक्षणाक सुरवात
भांगरभूंय । खबरां मेज
पणजी : राजभाशा अधिनेमाची अंमलबजावणी प्रशासनांत जातली जाल्यार देवनागरी टायपिंगाचें प्रशिक्षण घेवप खूब म्हत्वाचें थारता. राजभाशा संचालनालयान आयोजीत केल्ल्या देवनागरी टायपिंग प्रशिक्षणाचो लाभ सरकारी कर्मचार्यांक जातलोच, पूण प्रशासनांत राजभाशेची अंमलबाजवणी करूंक ताचो चड आदार जातलो, अशें विद्या प्रबोधिनी म्हाविद्यालयाचे प्राचार्य डॉ. भूषण भावे हांणी सांगलें. राजभाशा संचालनालयान आयोजीत केल्ल्या देवनागरी टायपिंग प्रशिक्षणाच्या उक्तावण सुवाळ्या वेळार ते उलयताले.
संचालनालयान सरकारी कर्मचार्यां खातीर तीन दिसांचें देवनागरी टायपिंग प्रशिक्षण पर्वरेच्या विद्या प्रबोधिनी म्हाविद्यालयांत आयोजीत केलां. 10 ते 12, 13, 14, 17 आनी 18 ते 20 फेब्रुवारी मेरेन तीन बॅचांनी तें दितले. ह्या प्रशिक्षणांचो लाभ सुमार 140 सरकारी कर्मचार्यांक जातलो, अशें राजभाशा संचालक प्रशांत शिरोडकार हांणी सांगलें. कोंकणी, मराठी, हिन्दी ह्या भाशांनी टंकलेखन करूंक देवनागरी टायपिंगाची संवकळ सरकारी कर्मचार्यांक जावची म्हणून हें प्रशिक्षण आयोजीत केलां अशें तांणी मुखार सांगलें.
देवनागरी टायपिंग प्रशिक्षणांत सॉफ्टवॅरांची वळख, इन्स्क्रिप्ट किबोर्डाची वळख तशेंच देवनागरी लिपयेची वळख, अक्षर वळख अश्या विशयांचेर वेग-वेगळीं सत्रां दवरल्यांत, अशें प्रशिक्षणाचे संयोजक आनी उपसंचालक अनिल सावंत हांणी सांगलें.
सुशांत नायक, उर्वशी नायक, जयेश राऊत आनी दिवाकर गुरव ह्या सहाय्यक प्राध्यापकांचीं विंगड विंगड सत्रां आयोजीत केल्यांत. प्रशिक्षणाचें सह-संयोजन स्नेहा सबनीस हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
