भांगरभूंय | प्रतिनिधी
मुंबय, खबरां संस्था: ज्येश्ठ मराठी साहित्यीक, समीक्षक रा. रं. बोराडे (८५) आयज छत्रपती संभाजीनगर शारांत अंतरले. कांय दिसां आदीं तांकां महाराष्ट्र सरकाराचो जिणेगौरव पुरस्कार घोशीत केल्लो. २७ फेब्रुवारीक हो पुरस्कार तांकां भेटोवपाचो आशिल्ले.
बोराडे हाचो जल्म २५ डिसेंबर १९४० दिसा लातूर जिल्ह्यांतल्या काटगांव ह्या ल्हानशा गांवांत एका शेतकार कुटुंबांत जालो. यत्ता चवथी उपरांत फुडल्या शिक्षणा खातीर तांणी गांव सोडलो. बार्शी, सोलापूर, संभाजीनगर अशा शारांत रावन शिक्षण पुराय केलें.
१९५७ वर्सा रा. रं. बोराडे हांची पयली कथा प्रसिद्ध जाली. १९६२ वर्सा आयिल्ल्या ‘पेरणी’ ते ‘ताळमेळ’, ‘मळणी’, ‘वाळवण’, ‘राखण’, ‘गोंधळ’, ‘माळरान’, ‘बोळवण’, ‘वरात’, ‘फजितवाडा’, ‘खोळंबा’, ‘बुरुज’, ‘नातीगोती’, ‘हेलकावे’, ‘कणसं’ ‘पाचोळा’, ‘माती’, ‘आग’, ‘धग’, ‘पाऊस’, ‘वारा’, ‘रान’, ‘शोध’, ‘झाडं’, ‘गंधवार्ता’ आनी ‘कडबा’ अश्या कथा संग्रहांनी मराठवाड्यांतल्या कश्टी लोकांच्या दुख्खाक भाशीक आविश्कारांतल्यान तांणी वाचा फोडली.
बोराडे हांणी ग्रामीण जिणेचेर आदारीत जायत्यो कथा, कादंबर्यो आनी लघुकथा संग्रह बरयले. ‘दिसांची राख’, ‘भरकटलेली वाट’, ‘सरणावरले सूर’, ‘कडेलोट’, ‘मृगजळ’ ह्यो तांच्यो कादंबरी. तांकां साबार पुरस्कार मेळ्ळे. महाराष्ट्रांतल्या सगळ्या विद्यापीठांनी तांचें साहित्य शिकयतात. जून १९८९ त हिंगोलीच्या १७ व्या मराठवाडा साहित्य संमेलनाच्या अध्यक्षपदां सयत तांणी विवीध साहित्य संमेलनांनी अध्यक्षपद भुशयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
