भांगरभूंय | प्रतिनिधी
पुलाचें दुरुस्तीकाम हातांत घेवपाची मागणी
म्हापशें: राण्याचें जुंवें, नादोडेंचो 38 वर्सां पोरणो लोखंडाचो पांयपूल मोडूंक पावला. ह्या पुलाची ताकतिकेन दुरुस्ती करची अशी मागणी थळाव्या लोकांनी केल्या.
नादोडें ते राण्याचें जुंवें जुंव्याक जोडपी लोखंडाच्या पुलाच्या चॅनलाचे जोड कळमेल्ल्यान हालींच तुटिल्ले. ह्या जुंव्याक जोडपी हो शापोरा न्हंये वेलो एकूच पूल आसा. तशेंच 38 वर्सां पयलीं तो बांदिल्लो. सद्या देखरेख नाशिल्ल्यान ह्या पुलाची वायट स्थिती जाल्या.
पुलाच्या चॅनलाचे जोड तुटिल्ल्याची म्हायती मेळ्ळे उपरांत मंत्री नीळकंठ हळर्णकार हांणी पंचायत मंडळ आनी भौशीक बांदकाम खात्याच्या अधिकाऱ्यां सयत पुलाक भेट दिवन पळोवणी केली. ह्या वेळार पुलाचें दुरुस्तीकाम रोखडेंच हातांत घेवपाची सुचोवणी तांणी भौशीक बांदकाम खात्याच्या अधिकाऱ्यांक दिली.
थळावे पंच वांगडी विश्वजा हळदणकार हांणी म्हणलें, हो पूल राण्याचें जुंवें जुंव्या वेल्या लोकांचें येरादारीचें एकूच साधन. ह्या वाड्यार वट्ट 35 कुटुंबां ह्या पुलाचेर निंबून आसात. ताका लागून मुख्यमंत्री डॉ. प्रमोद सावंत आनी मंत्री नीळकंठ हळर्णकार हांणी लक्ष घालून तो रोखड्या रोखडो सरकारा वतीन दुरुस्त करचो अशी मागणी तांणी केली.
राण्याचें जुंवें हांगासरल्या पुलाची आमी पळोवणी केल्या. हो पूल मोडल्यार वाड्या वेल्या लोकांची व्हड प्रमाणांत गैरसोय जावंक शकता. ताका लागून मुख्यमंत्र्या कडेन पुलाचें दुरुस्तीकाम रोखड्या रोखडें हातांत घेवचें अशी विनंती केल्या अशी म्हायती नुस्तेमार मंत्री नीळकंठ हळर्णकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
