भांगरभूंय | प्रतिनिधी
मुरगांव उपनगराध्यक्षः कपडो काडात वा स्पश्टीकरण दियात
भांगरभूंय । प्रतिनिधी
वास्कोः बायणा ते मुरगांव बंदर कनेक्टिव्हीटी केबल स्टेड आनी उड्डाण पूल विवीध कारणांक लागून चर्चेंत आसा. मुरगांव बंदर प्राधिकरणान बायणाच्या उड्डाण पुला पोंदांच्या रस्त्याचेर लोखंडाची गेट घातिल्ल्यान ती गेट खूब गाजिल्ली. आतां थंयचें एक थळ आनी अंतर दाखोवपी तकट्याचेर कोणे तरी कपडो गुंठलायिल्ल्यान तो तकटो चर्चेंत आयला. तशेंच कांय तकट्यांक लागून गोंदळ वाडिल्ल्यान त्या तकट्या विशींय चर्चा सुरू जाल्या. ह्या प्रकरणांत राष्ट्रीय म्हामार्ग प्रादिकरणान त्या तकट्या संबंदांत चवकशी करची. तो तकटो कित्या खातीर धांपला, ताचें स्पश्टीकरण दिवचें, वा ताचे वयलो कपडो तरी काडचो, अशी मागणी मुरगांवचे उपनगराध्यक्ष रामचंद्र कामत हांणी केल्या. मुरगांव पालिका प्रशासकीय इमारतीचें नुतनीकरण केलां. तिचें मंगळारा 11 फेब्रुवारीक उक्तावण करचे खातीर मुख्यमंत्री डॉ. प्रमोद सावंत वास्को येतले. कांय जाण ते गेटीची पळोवणी करपाची विनवणी करपाची शक्यताय आसा. बायणा पुला पोंदच्या रस्त्याचेर लोखंडाची व्हड गेट घातिल्ल्यान तो पूल लोकां खातीर बंद जावपाची दुगदूग लोकांक लागल्या. ह्या प्रकरणांत वास्कोचे आमदार कृष्णा साळकार हांणी ती गेट काडपाकूच जाय अशी भुमिका घेतल्या. ते अजून आपले भुमिकेचेर ठाम आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
