भांगरभूंय | प्रतिनिधी
पर्यटन मंत्र्याची विधानसभेंत लेखी जाप
भांगरभूंय । प्रतिनिधी
पणजी : पर्यटन खात्यान आपली 18 वेवसायीक मालमत्ता खाजगी कंपन्यांक चलोवपाक दिल्यात आनी तातूंतल्यान फाटल्या चार वर्सांत 16.35 कोटी रुपया महसूल भाड्यांतल्यान जमा जाला. हातूंत गोंय पर्यटन उदरगत महामंडळाच्यो 10 जाल्यार पर्यटन खात्याच्यो आठ मालमत्ता आसात, अशी म्हायती पर्यटन खात्यान दिल्या.
विधानसभेंत मडगांवचे आमदार दिंगबर कामत हांणी विचारिल्ल्या प्रस्नाक पर्यटन मंत्री रोहन खंवटे हांणी लेखी जाप दिल्या. गोंय पर्यटन उदरगत म्हामंडळाच्यो (जीटीडीसी) चलोवपाक दिल्ल्या 10 मालमत्तेंतल्यान 10.52 कोटी रुपया महसूल जमा जाला जाल्यार पर्यटन खात्यान चलोवपाक दिल्ल्या 8 मालमत्तेंतल्यान 5.83 कोटी रुपया महसूल एकठांय जाला.
हणजूण्यां सासणाचें बांदकाम आशिल्लें एक हॉटेल जीटीडीसीन गेस्ट हावस हॉस्पिटेलीटी प्रा. लि. हांकां चलोवपाक दिलां. तांणी 2023 ते 2025 मेरेन 1.99 कोटी रुपया महसूल जोडून दिला. जाल्यार हणजूण्यां तात्पुरते बांदकाम आशिल्लें दुसरें हॉटेल आझरा रॅस्टोरेंण्ट प्रा. लि. हांकां चलोवपाक दिलां. तांणी 2023 ते 2024 मेरेन 14.40 लाख इतलो महसूल दिला.
कळंगूट रेसिडेन्सी एनेक्स ही इमारत साई सागर हॉस्पिटेलीटी सर्वीस प्रा. लि. हांकां चलोवपाक दिल्या आनी 1.31 कोटी रुपया महसूल म्हामंडळा दिला. कर्नाटका कमर्शियल आनी इडस्ट्रीयल कॉर्पोरेशन प्रा. लि. म्हामंडळाची बागा दर्यादेगेर पार्कींग सुवात चलयता आनी फाटले दोन वर्सांत 75.61 लाख रुपया महसूल जोडला.
मयें तळ्या वयली सुविधा आनी पार्कींग मयें लेक होस्पिटेलीटी एलएलपी पळयता. तांणी 2023 आनी 2024 वर्सांत 22 लाख महसूल म्हामंडळाक दिला. तशेंच आग्वाद किल्लो आनी सुवात चलोवपी वॉटरफ्रंण्ट एस्कपिर्यन्सीस प्रा. लि. हांणी म्हामंडळाक फाटल्या दोन वर्सांत 2.63 कोटी रुपया महसूल दिला. फर्मागुडी रेसिडेन्सीची लॉन (जार्दीन) सुवात कवळेंकार नाट्य वस्तू भांडार हांकां चलोवपाक दिल्या आनी वर्स 2022 ते 2024 मेरेन 20.80 लाख रुपया महसूल जो़डून दिला.
फाटल्या अडेज वर्सांत कोलवा गोवा हॉटेल्स प्रा. लि. हांणी कोलवा रेसिडेन्सी खातीर 4.19 कोटी, सेन्डक्रेस्ट इस्टेट प्रा लि. हांणी म्हापसा रेसिडेन्सी खातीर 1.31 कोटी आनी डिअरफिल्ड्स हॉटेल्स प्रा. लि. हांणी बाणावली रेसिडेन्सी खातीर 4.06 कोटी रुपया महसूल दिला.
पर्यटन खात्याचो मालमत्ता देखीक मल्टी लेव्हल कार पार्किंगा खातीर 1.62 कोटी आनी कळंगूट पार्कींग सुवाते खातीर 2.05 कोटी फाटल्या चार वर्सांत महसूल एकठांय जाला. तशेंच फाटल्या चार वर्सांत आग्वाद आनी कांदोळी पार्किगेंतल्यान 79.36 लाख रुपया महसूल आयला. फाटल्या दोन वर्सांत दोनापावल पार्कींग आनी जेटींतल्यान 75 लाख आनी अंजुणे केरी इको पर्यटन प्रकल्पांतल्यान पोरूं 36 लाख महसूल आयला. फाटल्या तीन वर्सात पोरणें गोंया हेलिपॅडांतल्यान 25 लाख महसूल सरकाराक आयला, पूण 2024 त सोअरींग एअरोस्पेस प्रा. लि. हांचे कडलो टेंडर उपरांत रद्द केलो. 2023 ते आतां मेरेन कोलवा पार्किंगेंतल्यान अजून मेरेन कसलोच महसूल सरकाराक येवंक ना आनी हें पार्कींग चलोवपी सोहन जुवारकार हाची थकबाकी भरपाचो आसा. पणजी फेरी जेटी कडेन आशिल्ले पर्यटन सुविधेंतल्यान एक दुडू येवंक ना आनी ही सुविधा चलोवपी त्रिशुल बिल्टटेच हांणी मुफत दिवपाचो काळ वाडोवपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
