भांगरभूंय | प्रतिनिधी
उदका स्रोत मंत्री सुभाष शिरोडकार हांची म्हायती
पणजीः चिंबला वाठारांतल्या बेकायदो बोर वॅलांचेर उदका स्रोत खात्यान बडी मारल्या. चिंबला सुमार ६० ते ७० बोर वॅल मारिल्ल्याचें खात्याचे नदरेक आयलें. तांकां नोटीसी जारी जाल्यात आनी पुलिसांचे मजतीन बेकायदो बोर वॅल बंद करतले, अशें उदका स्रोत मंत्री सुभाष शिरोडकार हांणी सांगलें.
चिंबला सुमार ६० ते ७० बोर वॅल मारल्यात अशी कागाळा शुक्रारा आयिल्ली. हें कळनाफुडें मुखेल अभियंते प्रमोद बदामी हांणी नोटीस काडल्या आनी सहाय्यक अभियंते आनी कनिश्ठ अभियंत्याक तांची पळोवणी करपाचे निर्देश दिल्यात, अशें शिरोडकार हांणी सांगलें.
हे दोनय अधिकारी सुवातेर वचून तपासणी करतले आनी पुलिसांचे मजतीन ह्या बोर वॅलींच्यो जोडण्यो कातरतले. ते भायर ज्या लोकांनी बेकायदो बोर वेल मारल्यात तांचेर खर पावलां उबारतले. कायद्यान तरतूद केल्ले प्रमाण तांकां ५ ते १० लाख मेरेन दंड दितले. जांकां बांय वा बोर वेल मारपाक जाय तांणी पयलीं परवानगी घेवन काम करचें. बेकायदो कामा करप बरोबर न्हय. ह्या प्रकरणाची तपासणी करून फावो ती कारवाय करतले, अशी शिटकावणी मंत्र्यान दिली.
अधिकार्यांनी पुराय दीस गांवांत भोंवडी मारून बोर वॅल सोदप हें शक्य ना. कोणेंय तरी आमचे तें नदरेक हाडून दिवपाक जाय. मात राज्यांत कितल्यो बोर वॅली आसात आनी आमच्या अभियंतांच्या त्यो कश्यो नदरे खाला येवंक ना हाची आमी चवकशी करतले. तपासणी जावन सत्य मुखार येवंदी. कितल्यो बेकायदेशीर बोर वॅल वा बांयो मारल्यात तांची म्हायती फुडें आयले उपरांत फुडली कारवाय जातली, अशें शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
