भांगरभूंय | प्रतिनिधी
पेडणें: तीन म्हयन्यांच्या कार्यकाळांत मांद्रें पंचायत वाठाराची कितली उदरगत जातली? आनी कितली उदरगत करपाक मेळटली? ही सगळी जापसालदारकी नव्या सरपंचाचेर आसतली. मांद्रें सरपंचपदार परत एकदां तीन म्हयन्यां खातीर नवे सरपंच म्हणून राजेश मांद्रेंकार हांची विरोधा विणें निवड जाली.
फाटल्या तीन म्हयन्यां खातीर सरपंच म्हणून मिंगेल उर्फ रोजा फर्नांडीस हांची निवड जाल्ली. हाचे खाला अलिखीत कबलाती प्रमाण मिंगेल फर्नांडीस हांणी पदाचो राजिनामो दिल्लो आनी फुडल्या तीन म्हयन्यां खातीर हें पद रितें केलें. ते प्रमाण १० तारखेक मांद्रें पंचायत मंडळाची खास बसका आनी सरपंच पदा खातीर वेंचणूक घेतली. ह्या वेळार सरपंच पदा खातीर राजेश मांद्रेंकार हांचो एकूच अर्ज दाखल जाल्ल्यान तांची विरोधाविणें निवड घोशीत केली.
ह्या वेळार उपसरपंच तारा हडफडकार, पंच वांगडी चेतना पेडणेंकार, पंच वांगडी संपदा आजगांवकार, पंच महेश, पंच किरण सावंत, पंच रॉबर्ट फर्नांडीस आनी हेर पंच वांगडी हजर आशिल्ले. आदले सरपंच तशेंच आतांचे पंच ऍड अमित सावंत, बाळा उर्फ प्रशांत नायक, मिशेल फर्नांडीस हे तीन पंच वांगडी हजर रावूंक ना.
तीन- तीन म्हयन्यां खातीर एकेकट्याक सरपंच जावपाची संद दिवपाची अलिखीत कबलात सत्तारुढ गटांत जाल्ली. ह्या तीन म्हयन्यांत पंचायत मळाची कशे तरेची उदरगत नव्या सरपंचांक करपाक मेळटली? तांचेर कशे तरेची जापसालदारकी उरतली. होय एक प्रस्न आतां उबो रावला. संगीत खुर्चीच्या खेळाक लागून ह्या अलिखीत कबलाती प्रमाण तीन-तीन म्हयन्यां खातीर सरपंच बदलिल्ल्यान उदरगतीक ब्रेक लागता काय? असो दुबाव निर्माण जाता. फाटल्या तीन म्हयन्यांत पंचायत वाठाराची कसली उदरगत जाली. हाचेर सध्या सगळ्याक चर्चा सुरू जाल्या. तशेंच फुडल्या तीन म्हयन्यांत कसले तरेची उदरगत जातली? हेंय सांगप कठीण जालां.
नवे सरपंच राजेश मांद्रेंकार हांणी सांगलें, आपल्याचेर पंच वांगड्यांनी विस्वास दाखोवन आपल्याक सरपंच पद दिलां. ह्या सरपंच पदाच्या कार्यकाळांत पुराय पंचायत वाठाराची उदरगत करपा खातीर आपूण यत्न करतलों. थळावे आमदार जीत आरोलकार आनी सरकारा वरवीं पंचायत वाठाराचे उदरगतीचेर भर दितले अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
