भांगरभूंय | प्रतिनिधी
नवी दिल्ली, खबरां संस्था ः भारतांत बायलां खातीर खंयचीं सुरक्षीत शारां ह्या प्रस्नाची जाप एका सर्वेक्षणांतल्यान मेळ्ळां. ‘द अवतार ग्रुप’ (The Avtar Group) या ‘वर्कप्लेस कल्चर कन्सल्टिंग फर्म’ ह्या गटान हें सर्वेक्षण केलां. ते प्रमाण काम करपी बायलांक कर्नाटकाची राजधानी बेंगळूरु हें सगळ्यांत सुरक्षीत शार दिसता अशी म्हायती मेळ्ळ्या. बेंगळुरू उपरांत चेन्नय दुसरे सुवातेर आसा. मुंबय तिसरे, हैदराबाद चवथे, पुणें पांचवे आनी उपरांत कोलकाता, अहमदाबाद, दिल्ली, गुरूग्राम आनी कोयंमतूर हांचो क्रमांक लागता.
वट्ट 25 सुरक्षीत शारांचे वळेरेंत दक्षीण भारत आघाडेचेर आसा. हे वळेरेंत 25 तली 16 शार दक्षीण भारतांतली आसात. उत्तर भारतांतल्या शारां परस दक्षीण भारतांतल्या शारांनी चड सुरक्षीतताय दिसता अशें बायलांनी सांगलां. देशांतल्या 120 शारांची सरकारी आंकडेवारी आनी अवतार गटाच्या संशोधनाचेर आदारून हो अहवाल तयार केला.
म्हत्वाचें म्हणल्यार लैंगिक समानतायेच्या मुद्दाचेर दक्षीण भारतांतलीं शारां उत्तर भारतांतल्या शारां परस बरी आसात अशें बायलांनी सांगलें. हे वळेरेंत तमिळनाडूतल्या शारांचो आंकडो 8 सगळ्यांत चड आसा. बेंगळुरू शारांत जरी सगळ्यांत चड रोजगाराची संद आसली तरी समाजीक सहभागाच्या नदरेन तिसरें क्रमांकाचेर आसा. हे वळेरेंत मुंबयन उदरगत केल्या. 2023 वर्सा चवथ्या क्रमांकाचेर आशिल्ल्या मुंबयन 2024 वर्सा तिसरो क्रमांक मेळयला. गुरुग्राम 2023 वर्सा 20व्या क्रमांकाचेर आशिल्लो तो 2024 वर्सा 9वे सुवातेर पावला.
हें सर्वेक्षण फेब्रुवारी 2024 ते नोव्हेंबर 2024 ह्या काळांत केल्लें. तातूंत 60 शारांतल्या 1672 बायलांनी वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
