भांगरभूंय | प्रतिनिधी
अखेरेक दिल्ली विधानसभा वेंचणुकेंत भाजप जिखलो. 27 वर्सां उपरांत ताका राजधानी राज्याचो ताबो मेळ्ळा. तोय बी भोवमतान. तांकां 48 तर आम आदमी पक्षाक (आप) 22 जागे मेळ्ळ्यात. 2015 चे वेंचणुकेंत आपान 70 तले 67 जागे जिखून विक्रम केल्लो. 2020 चे वेंचणुकेंत 62 जिखिल्ले. फाटल्या तिनूय लोकसभा वेंचणुकांनी मात दिल्लीकार भाजपा फाटल्यान रावले. फाटले म्हापालिका आनी हे विधानसभा वेंचणुकेंतूय तांणी हातांत कमळ घेतलें. काँग्रेस पक्ष मात फाटलीं 10 वर्सां दिल्लींत फाटल्यांत पडला. एका काळार हांगां राज्य करपी ह्या पक्षाक आतां 0, 1 अशे जागे मेळटात. कांय राज्यां सोडल्यार काँग्रेस पक्ष केन्नाच कोमांत गेला आनी आतां चमत्कारुच ताका साबुदीर हाडपाक शकता. दोतोर (फुडारी) आपले परीन यत्न करतात, पूण आतां सगलें कितें देवाच्या (मतदार) हातांत आसा! आपाकूय हारीचेर चिंतन करचें पडटलें. भाजपा कडेन आसा तशी वावुरप्यांची यंत्रणां उबारची पडटली. जिखपा खातीर भाजपा जे डावपेच खेळटा तातूंत तरबेज जावचें पडटलें. अर्थांत निमणें जैत मतदारांचेर अवलंबून आसता.
विरोधी पक्ष बळिश्ट आसूंक जाय, नाजाल्यार एकाधिकारशाय देशाचें लुकसाण करपाक शकता, अशे राजकी जाणकार म्हणटात. आयज देशांत (दक्षीणे कडलीं राज्यां सोडून) भाजपाक टक्कर दिवपी सशक्त अशे मेजकेच पक्ष उरल्यात. तातूंतलो आप आतां दिल्लींत कुशीक पडला. पंजाबांत उरला. आपा फाटोफाट अस्तंत बंगालांत तृणमृल काँग्रेस आसा. ताकाय धपको बसत जाल्यार विरोधी पक्षांची एकवटीत शक्त आनीक उणी जातली. इंडी आघाडेंत वाद आसा, तातूंत आतां हमखास वेंचून येवंक शकतात अशे बिगरभाजपा फुडारी भाजपांत वचत आसात. थोडे आपूण जावन गेल्यात, तर थोड्यांक वच्चें पडलां खंय! गोंय, महाराष्ट्र हीं दोन उदाहरणां. फक्त फुडारीच न्हय, तर तांच्या वावुरप्यांनीय पक्ष बदल्ला. थोडे मतदार रेवड्यांचे (फुकटच्यो सवलती, येवजण्यो) आशेन बदल्ल्यात. गरीब, गरजू लोकां खातीर सुरू केल्लो हो प्रकार आतां मध्यमवर्गीयांकूय आकर्शित करपाक लागला… आनी रेवड्यो वांटपांत सगलेच पक्ष फिशाल जाल्यात. 30- 35 वर्सां पयलींची तत्वनिश्ठ विचारसरणी आतां फाटीं पडल्या. पक्षांतर, म्हारगाय, सर्तीक विटिल्ले सुवार्थ, सादोवन घेवपाच्या विचारांत गुंग आसतात. फुडारी तत्वहिन, भ्रश्टाचारी, धुर्त, तडजोड करपी जाल्यात अशें म्हणटात. हे मतदारुय तांचे भशेनूच जावंक नात?…. हाचे मुखार बदलिल्ल्या राजकी मळाची नाडी जाणें वळखली तोच पक्ष येसस्वी. अर्थांत हातूंत देशाचो फुडार कितें, तें येवपी काळूच सांगतलो.
10 वर्सां एकूच पक्ष सत्तेर आशिल्ल्यान लोकांनी प्रस्थापितां आड रावप पसंत केलें आसुं येता. आपान भलायकी, शिक्षण मळाचेर बरें काम केलां. मात, हवेच्या प्रदुशणा सयत कांय प्रस्न तशेच उरल्यात. तातूंत केजरीवाल, मनिष सिसोदिया, संजय सिंह सारक्या कांय फुडाऱ्यांक सोरो धोरण भानगडींत बंदखणींत वच्चें पडिल्ल्याचो परिणामूय आपाचेर जालो. विरोधकांक हे वेंचणुकेंत ताचोच प्रचार फायद्याचो पडलो. तातूंत कांय फुडारी आप सोडून गेले. सादे मनीस अशी केजरीवाल हांची प्रतिमा आशिल्ली. पूण मुख्यमंत्र्यांचो बंगलो दुरुस्त करप तांचे प्रतिमेक बादक थारलें. कॅगाच्या अहवाला प्रमाण, बंगल्याचे दुरुस्तीचेर थारायिल्ल्या 7.91 कोटी खर्चा बदला 33.66 कोटी रुपया खर्च जालो. त्या वेळार बोवाळ जाल्लो. केंद्र सरकारान कामांनी आडमेळीं हाडलीं, असो आरोप आपान केलो. भाजपान तो न्हयकारलो. मतदारांच्या मनात हांगाय संभ्रम निर्माण जालो. काँग्रेसीच्या भोवतेक उमेदवारांचे डिपाॅझिट जप्त जालां. तरीय आपान तांचे वांगडा युती केल्ली जाल्यार निकाल कांयसो वेगळो येवपाचो, असो दावो राजकी जाणकारांनी केला. हे फावट काँग्रेसीन आपाचेर खर टिका केली. मतदार घुंवपाचें तेंय एक कारण अशें म्हणल्यार सामकेंच फट थारचें ना. रस्ते, कोयर, गटारांची स्थितीय आपाक बादली, अशें थोड्यांक दिसता.
भाजपान हे खेपे प्रचारा वेळार हिंदुत्वाचो मुद्दो कुशीक दवरून भ्रश्टाचार, प्रदुशणाचेर भर दिलो. केंद्रीय पांवड्या वयल्यो येवजण्योय चालीक लायल्यो. लोकसभा वेंचणुकां वेळार फाटल्यान राविल्ले मतदार पयस वच्चे नात, ताची जतनाय घेतली. डिजीटल प्रचारांतूय भाजप मुखार आशिल्लो. हे वेंचणुकेच्या प्रचारांत सगलेच पक्ष विरोधकांचेर टिका करतना दिसले. तशी ती आतां परंपराच जाल्या. आपूण कितें करतलो हाचे परस पक्ष आतां विरोधकां वयले खरे, फट टिकेचेर भर दितना दिसतात.
आपान हार मानून घेतल्या. खर विरोधक म्हूण सक्रिय रावपाची घोशणा केल्या. दिल्लीचें राजकारण कसलो रंग घेता, तें कांय दिसांनी कळटलेंच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
