भांगरभूंय | प्रतिनिधी
पणजी : इकरावेक नापास जाल्ले 157 विद्यार्थी अंदूं थेट बारावीचे परिक्षेक बसतले. दर वर्सा 10 ते 12 विद्यार्थी थेट बारावेची परिक्षा दिता. अंदूं हो आंकडो वाडला. इतले मजगतीं, अंदू 17718 विद्यार्थी बारावेची परिक्षा दितले. फाटल्या वर्साचे तुळेन अंदूं 207 विद्यार्थी चड आसा. बारावेची परिक्षा 10 फेब्रुवारी सावन सुरू जातली.
शालान्त मंडळाचे अध्यक्ष भगीरथ शेट्ये हांणी ही म्हायती दिली. इकरावेक नापास जावन लेगीत खासगी विद्यार्थ्यांच्या गटांत परिक्षेक बसपी विद्यार्थ्यांचो आकडो अंदूं वाडला. तशेंच आयटीआय जाल्ले 50 विद्यार्थी अंदूं बारावेची परिक्षा दितले. हो आंकडो नेमीत (रेगुलर) परिक्षा दिवपी विद्यार्थ्यांच्या आंकड्यांत जमेक धरलो वच्चो ना. कला शाखेत 4076 विद्यार्थी, वाणीज्य शाखेत 5092 विद्यार्थी, विज्ञान शाखेत 6095 जाल्या वेवसायीक शाखेत 2455 विद्यार्थी परीक्षेक बसतले.
अंदूं बारावेची परिक्षा 10 फेब्रुवारी 2025 सावन सुरू जाता. फाटल्या वर्सा (2024) 17511 विद्यार्थी परिक्षेक बशिल्ले. अंदूं 207 विद्यार्थी चड आसात. दर वर्सा विद्यार्थ्यांचो आंकडो बदलत आसता. विद्यार्थ्यांच्या आंकड्यांत चड फरक पडूंक ना, अशें मंडळाचे अध्यक्ष भगीरथ शेट्ये हांणी सांगलें.
सगले विशय घेवन (रिपीटर) परिक्षेक बसपी विद्यार्थ्यांचो आंकडो 36 आसा. हातूंत 20 विद्यार्थी आनी 16 विद्यार्थिंनी आसात. तशेंच कांय विशय घेवन (रिपीटर) परतून परिक्षेक बसपी विद्यार्थ्यांचो आंकडो 828 आसा. पयलींच्या निकालांत सुदारणा (इम्प्रुमेंट) करपा खातीर 17 विद्यार्थी परिक्षेक बसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
