भांगरभूंय | प्रतिनिधी
वाळपयः कर्नाटक सरकाराच्या मनात येता त्या कारभाराक लागून म्हादय न्हंयेचेर आयिल्लें संकश्ट येवपी काळांत गोंया खातीर सामकें धोक्याचें आसा. फुडल्या 10- 20 वर्सांत न्हंयेचें अस्तित्व उरपाक जाय, जाल्यार सरकारान गंभीर जावेचं. म्हादय वाटावपाक समाजवावुरपी राजेंद्र केरकार बरे तरेन काम करतात. तांकां लागूनच हे चळवळीक वजन आयलां. ताका लागून केरकार हांणी येवपी काळांत आक्रमक पद्दतीन बाजू मांडची. आमचो तांकां सक्रीय तेंको आसतलो, अशी विनवणी गोंय काँग्रेसीच्या सेवा दल विभागान केल्या.
दलाच्या गोंय विभागाचे अध्यक्ष राजन घाटे, महिला विभागाची अध्यक्ष रोशन देसाय, सरचिटणीस वालेरियन फर्नांडीस, युवा विभाग अध्यक्ष दीपेश सिमेपुरुषकर हांणी हालींच केरकार हांची भेट घेवन तांचे कडेन म्हादयचेर सविस्तर चर्चा केली.
म्हादय न्हंय वाटावपाक जाय जाल्यार सरकारान कितें करपाक जाय, सध्याची परिस्थिती हाचेर शिश्टमंडळान केरकार हांचे कडेन सविस्तर भासाभास केली.
हे विशीं सेवा दल स्वता जागृताय करता. दरेकल्याच्या जिवितांत उदकाक म्हत्व आसा. येवपी काळांत उदका खातीर झगडीं जावपाचीं शक्यताय आसा. न्हंयचो फायदो कितें तें आमी सांगपाची गरज ना. कर्नाटकान न्हंय वळयली जाल्यार गोंयाचेर उदका संकश्ट येवं येता. ताका लागून सरकारान बेगीन यत्न करपाक जाय, अशें राजन घाटे हांणी उपरांत पत्रकारां कडेन उलयतना सांगलें.
म्हादय न्हंयेचो प्रस्न न्यायालयांत नाशिल्लो जाल्यार आतां मेरेन कर्नाटक न्हंयेचें उदक पुरायपणान वळोवपाक येसस्वी जावपाचें. ह्या आंदोलनाचें खरें स्रय राजेंद्र केरकार हांकां वता. तांणी कसलीच पर्वा करीनासतना सातत्यान हो लढो जिवो दवरलो. ही न्हंय गोंयची जिवनदायिनी आशिल्ल्याचें सिद्ध जालां. तेन्ना सरकारान कसलीच निश्काळजीपणा करीनासतना आनी फक्त घोशणा करिनासतना न्हंये बाबत गंभीर जावप सामकें गरजेचें आसा, अशेंय घाटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
