भांगरभूंय | प्रतिनिधी
मुख्यमंत्रीः प्रतिक्षा पर्यवरणीय दाखल्यांची
भांगरभूंय । प्रतिनिधी
पणजीः मांडवी आनी जुवारी ह्या दोन न्हंयांतल्यान रेंव काडचे खातीर ऑनलायन पद्दतीन आतां मेरेन 185 अर्ज आयल्यात. तांची छाननी चालू आसा. कायदेशीर रेंव काडपाक सुरू करचे खातीर गरजेच्या पर्यावरणीय दाखल्यांची खण खातें प्रतिक्षा करता, अशें मुख्यमंत्री डॉ. प्रमोद सावंत हांणी विधानसभेंतल्या लेखी प्रस्नाक दिल्ले जापेंतल्यान स्पश्ट केलां. विरोधी पक्ष फुडारी युरी आलेमांव हांणी हे विशींचो प्रस्न विचारिल्लो.
गोंयांतल्या मांडवी आनी जुवारी ह्या दोन न्हंयांतल्यान कायदेशीर रेंव काडपाचो मार्ग मेकळो जालो. गरजेचे पर्यावरणीय दाखले मेळ्ळे उपरांत रेंव काडपाक सुरवात करतले. गोंयांत रेंव काडप बंद आशिल्लें. त्या काळांत महाराष्ट्र आनी कर्नाटक ह्या दोन राज्यांतल्यान रेंवेची आयात जाताली. ते खातीर स टायरां सकयल्या गाडयां खातीर 800 रुपया आनी स टायरा वयल्या गाडयां खातीर 1,500 रुपया प्रोसेसींग फी घेतिल्ली, अशें मुख्यमंत्र्यान एका प्रस्नाक दिल्ले जापेंत स्पश्ट केलां. मजगतीं, पर्यावरणीय प्रभाव मुल्यांकन प्राधिकरणान कांय दिसांच आदीं दिल्ल्या पर्यावरणीय दाखल्यांक लागून सात वर्सां उपरांत गोंयांत रेंव काडपाचो मार्ग कायदेशीर तरेन मेकळो जाला. पूण रेंव काडपाक आतां दर्यादेग वाठार वेवस्थापन प्राधिकरणा कडल्यान (सीझॅडएमए) मान्यताय मेळप गरजेचें आसा. सीझॅडएमए कडल्यान परवाने मेळटाच रेंव काडपाक सुरवात जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
