भांगरभूंय | प्रतिनिधी
कायदो- सुवेवस्था सांबाळपाची जापसालदारकी उपजिल्होधिकारी, प्रशासकांचेर
भांगरभूंय । प्रतिनिधी
पणजीः आयतारा 9 फेब्रुवारीक जावपी उत्तर आनी दक्षीण गोंयांतल्या देवळांच्या समितींच्यो वेंचणुको मुक्त, निश्पक्ष आनी शांततायेच्या वातावरणांत जावच्यो हे खातीर कायदो आनी सुवेवस्ता सांबाळपा खातीर उत्तर आनी दक्षीण गोंय जिल्होधिकाऱ्यांनी उपजिल्होधिकारी, मामलेदार तशेंच देवस्थानांच्या प्रशासकांक निर्देश जारी केल्यात.
वेंचणूक प्रक्रिये मजगतीं, उपजिल्होधिकारी तशेंच देवस्थानांच्या प्रशासकांनी आपापल्या कार्यक्षेत्रांत कायदो आनी सुवेवस्था सांबाळपा खातीर गरजेची पावलां उखलचीं. हे मजगतीं, कसलीच वायट घडणूक घडची न्हय हे खातीर संबंदीत पुलीस स्टेशनां कडेन समन्वय दवरचो, कसलीय गुप्त म्हायती मेळ्ळ्यार ती पुलीस तशेंच संबंदीत कार्यकारी दंडाधिकाऱ्यांक तत्काळ कळोवची, कायदो आनी सुवेवस्था इबाडची न्हय हे खातीर संबंदीत वाठारात पुलीस तैनात करचे, अशे निर्देश जिल्होधिकाऱ्यांनी दिल्यात.
दक्षीण गोंय जिल्होधिकाऱ्यान निर्देशांत म्हणलां, देवस्थानांच्या वेंचणुकां खातीर नेमिल्ल्या वेंचणूक निरिक्षकांनी देवस्थानांत हाजीर रावून वेंचणुको मुक्त, निश्पक्ष आनी शांततायेंत घेवच्यो. देवस्थान प्रशासकां सयत संबंदीत अधिकाऱ्यांनी वेंचणूक प्रक्रिया पुराय जाय मेरेन आपापल्या कार्यालयांत तशेंच नेमणूक केल्ले सुवातांचेर हाजीर रावप सक्तीचें आसतलें, वेंचणूक प्रक्रियेंत वांटो घेतिल्ले अधिकारी वा कर्मचाऱ्यांक आयतारा रजा दिवचे नात. सगल्या संबंदीत अधिकाऱ्यांनी सोमारा सांजेच्या 5 वरां मेरेन जिल्होधिकारी कार्यालयाक अनुपालन अहवाल सादर करप सक्तीचें आसा, अशें निर्देशांत म्हणलां. मजगतीं, दक्षीण गोंयांतल्या देवस्थानांच्यो वेंचणुको सुरळीत जावच्यो हे खातीर अतिरिक्त जिल्होधिकारी- 2, अतिरिक्त दंडाधिकारी- 2 आनी 3 हे नोडल अधिकारी म्हूण काम पळयतले, अशेंय निर्देशांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
