भांगरभूंय | प्रतिनिधी
नवी दिल्ली, खबरां संस्था ः रस्तो येरादारी आनी म्हामार्ग मंत्रालयान उजवाडायल्ल्या अहवालांत 2022 वर्सा दर दिसा उण्यांत उणे 462 जाणांक रस्ते अपघातांत मरण आयिल्ल्याचें स्पश्ट जालां. अहवाला प्रमाण 2022 वर्सा देशांत दर दिसा उण्यांत उणे 1,264 रस्ते अपघात जाले. “भारतांतले रस्ते अपघात” ह्या वर्सुकी अहवालांत अपघातांत मरण आयिल्लें एक भयानक चित्र उक्तें जालां. मरण आयिल्लें चडशें 25-35 वर्सां पिरायेच्या गटांतले आसात. तशेंच 2022 वर्सा रस्ते अपघातांत सुमार 1.68 लाख लोकांक मरण आयिल्ल्याचेंय आंकडेवारींतल्यान दिसून येता. तातूंतले उण्यांत उणे 42,671 लोक 25-35 वर्सां पिरायेचे आशिल्लें. मजगतीं, 2022 वर्सा तमिळनाडूंत सगळ्यांत चड 64,105 रस्ते अपघात जालें जाल्यार उत्तर प्रदेशांत सगळ्यांत चड 22,595 लोकांक मरण आयलें.
खंयच्या राज्यांत चड अपघाती मरण?
रस्ते अपघात सगळ्यांत चड आशिल्ल्या हेर राज्यांनी मध्य प्रदेश (54,432), केरळ (43,910) आनी उत्तर प्रदेश (41,746) हांचो आस्पाव आसा. उत्तर प्रदेशा उपरांत तमिळनाडूंत रस्ते अपघातांत मरण आयिल्ल्यांचो आंकडो सगळ्यांत चड आसून 17,884 लोकांक मरण आयलां. ते उपरांत महाराष्ट्रांत 15,224 जाणांक मरण आयलां, जाल्यार मध्य प्रदेशांत 13,427 जाणांक मरण आयलां. लक्षद्वीपांत 2022 वर्सा सगळ्यांत उणे 3 अपघात जाले आनी दोग जाणांक मरण आयलें.
रस्ते अपघातांत 12 टक्क्यांनी वाड….
2021 वर्सांचे तुळेंत 2022 वर्सा रस्ते अपघातांत 12 टक्क्यांनी वाड जाल्या. जाल्यार मरण येवपाचे प्रमाण 9 टक्क्यांनी वाडलां. 2022 वर्सा वट्ट रस्ते अपघातांचो आंकडो 4.61 लाख आशिल्लो, जाल्यार 2021 वर्सा 4.12 लाख आशिल्लो.
पिरायेच्या गटा प्रमाण अपघाती मरणाची आंकडेवारी…
अधिकृत आंकडेवारी प्रमाण, 2022 वर्सा रस्ते अपघातांत मरण आयिल्ल्या 18 वर्सां सकयल्या लोकांचो आंकडो 9,528 आशिल्लो, जाल्यार 2021 वर्सा हो आंकडो 7,764 आशिल्लो. 2022 वर्सा 60 वर्सां आनी ताचे वयर पिरायेच्या वट्ट 13,636 लोकांक अपघातांत मरण आयलें, जाल्यार 2021 वर्सा 11,739 लोकांक अपघातांत मरण आयलें.
रस्तो येरादारी आनी म्हामार्ग मंत्रालयान उजवाडायल्ल्या अहवालांत म्हणलां की, वेगान गाडी चलोवप, निश्काळजीपणान गाडी चलोवप, सोरो पियेवन गाडी चलोवप आनी येरादारी नेमांक पाळो दिवंक ना अशी कांय मुखेल कराणां आसात जाका लागून अपघातांत वाड जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
