भांगरभूंय | प्रतिनिधी
नवी दिल्ली, खबरां संस्था ः केंद्रीय मंत्रीमंडळान नव्या आयकर विधेयकाक मान्यताय दिल्या. सोमारा लोकसभेंत तें सादर जावं येता. खबरां प्रमाण, ह्या विधेयकाक लागून कर वेवस्थेंत व्हड सुदारणा जावंक शकता. नवीन आयकर विधेयक चड करून थेट कर म्हणून पळयतात. सद्याची कर रचणूक पद्दत सुदारप हो ताचो हेत. ताका चड संघटीत आनी पारदर्शक करपाची गरज आसा अशी म्हायती म्हायती आनी प्रसारण मंत्री अश्विनी वैष्णव हांणी दिली.
प्रधानमंत्री कुशळटाय विकास येवजणेंत व्हड बदल
मोदी सराकारान प्रधानमंत्री कौशल विकास येवजण 4.0 (PMKVVY 4.0), प्रधानमंत्री राष्ट्रीय अप्रेंटिस प्रमोशन येवजण (PM-NAPS) आनी जन शिक्षण संस्थान (JSS) येवजण्यो आतां केंद्रीय क्षेत्रीय कुशळटाय भारत कार्यावळींत आस्पावल्यात. हाका लागून तरणाट्यांक नव्या रोजगाराची संद मेळटली अशें सरकार सांगता. प्रधानमंत्री नरेंद्र मोदीन ह्या निर्णयाक इतिहासीक म्हणत हाका लागून भारताच्या तरणाट्यांक चालना मेळटली अशें सांगलें. पूण विरोधकांनी ताका वेंचणुकेची रणनिती अशें म्हणलां.
राष्ट्रीय सफाय कर्मचारी आयोगाक 3 वर्सांची वाड
नॅशनल कमिशन फॉर सॅनिटेशन वर्कर्स (NCSK) चो कार्यकाळ तीन वर्सां वाडोवपाक केंद्रीय मंत्रीमंडळान मान्यताय दिल्या. ताची मुजत पयलीं 31 मार्च 2025 दिसा सोंपपाची आशिल्ली, पूण आतां ती 2028 मेरेन वाडयल्या. ह्या निर्णयाक लागून नितळसाण कामगारांच्या समाजीक आनी अर्थीक उदरगतीक मजत जातली अशें केंद्रीय मंत्री अश्विनी वैष्णव हांणी सांगलें. धोकादायक नितळसाण कार्यावळी वेळार मरण येवपी लोकांचो आंकडो शून्या मेरेन उणो करप हो ह्या निर्णयाचो हेत आसा अशेंय सरकारान सांगलां.
प्रयोगशाळेत तयार केल्ल्या हिऱ्यांक नव्या नेमांतल्यान सुट
नव्या नेमा खाला प्रयोगशाळेत तयार केल्ल्या हिऱ्यांक सुट दितले अशें वाणिज्य आनी उद्देग मंत्री पीयूष गोयल हांणी राज्यसभेंत सांगलें. सध्या ह्या मळार नेटान उदरगत जाता. सरकार उद्देगांक मुक्तपणान काम करपाक दिता आनी ह्या मळार आनीक नेम घालप योग्य थारचें ना अशें पीयूष गोयल हांणी सांगलें.
मिशन पोशान 2.0 चो 10 लाख भुरग्यांक फायदो
केंद्रीय भलायकी राज्यमंत्री अन्नपूर्णा देवी हांणी संसदेंत सांगलें, मिशन पोशन 2.0 खाला आतां मेरेन 10 लाख भुरग्यांक फायदो जाला. हे येवजणे खाला 14 वर्सां सकयल्या भुरग्यांक पोशक अन्न दिता. हाका लागून कुपोशणाची समस्या उणी जातली असो दावो सरकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
