भांगरभूंय | प्रतिनिधी
नवी दिल्ली, खबरां संस्था ः अमेरिकेचे अध्यक्ष म्हणून परतून सत्तेर आयले उपरांत डोनाल्ड ट्रम्प हांणी जायते निर्णय घेतल्यात. हातूंत अमेरिकेंत बेकायदेशीर रितीन रावपी नागरिकांक देशांतल्यान धांवडावपाचो निर्णय आस्पावीत आसा. मजगतीं, अमेरिकेन बुधवारा आपल्या देशांत बेकायदेशीर रितीन रावपी 104 भारतीय नागरिकांक देशांतल्यान परत धाडल्यात. आतां ते अशें तरेन अमेरिकेंत रावपी आनीक 487 भारतीयांक देशांतल्यान धांवडावपाचे आसात. हे संबंदी म्हायती केंद्र सरकारान शुक्रारा दिली. पत्रकार परिशदेंत उलयतना परराश्ट्र सचीव विक्रम मिस्री हांणी सांगलें, अमेरिकेन आपल्या देशांत बेकायदेशीर रितीन रावपी 487 भारतीय नागरिकांची म्हायती केंद्र सरकाराक दिल्या आनी तांकां देशांतल्यान धांवडावपाचे आदेश जारी केल्यात.
हेर देशांतल्या नागरिकां आडय कारवाय…
मजगतीं, अमेरिकेंत बेकायदेशीर रितीन रावपी भारतीयांचेर कारवाय करचे पयलीं डोनाल्ड ट्रम्प सरकारान अशा शेंकड्यांनी नागरिकांक ब्राझील आनी कोलंबियांतल्यान परत घाल्यात. हाचे उपरांत दोनूय देशांनी ह्या निर्णयाचेर आपली नापसंती उक्तायली.
12 फेब्रुवारी सावन प्रधानमंत्री अमेरिकेक भेट दितले…
प्रधानमंत्री नरेंद्र मोदी 12 फेब्रुवारी सावन दोन दिसांच्या अमेरिका भोंवडेर वतले. हे भेटी वेळार अमेरिकेचे अध्यक्ष डोनाल्ड ट्रम्प हांचीय तें भेट घेतलें अशें परराश्ट्र मंत्रालयान शुक्रारा सांगलें. मोदीचे भेटेक लागून भारत-अमेरिका द्विपक्षीय संबंदाक आनीक गती आनी दिका मेळटली अशें परराश्ट्र सचीव विक्रम मिस्री हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
