पुजा नायका आड पर्वरी पुलिसां कडल्यान आरोपत्र सादर

भांगरभूंय | प्रतिनिधी

नोकरी घाटाळो प्रकरण

म्हापशें: आल्तो पर्वरेची प्रिया मणेरकार हिका सरकारी नोकरी मेळोवन दिवपाचें हांयस दाखोवन 4 लाख रुपयांक तोपी घाल्ल्या प्रकरणांत पर्वरी पुलिसांनी पुजा उर्फ रुपा पुरुषोत्तम नायक (39, पोरणें गोंय), अजीत शशिकांत नार्वेंकार (49, पिसगाळ, प्रियोळ- फोंडें) आनी अनिशा अजीत सतरकार (47, पिसगाळ, प्रियोळ- फोंडें) हांचे आड आरोपपत्र न्यायालयांत सादर केलां.

पुलिसांनी स साक्षिदारांच्या साक्षी सयत 113 पानांचें हें आरोपपत्र म्हापशेंच्या न्यायालयांत सादर केलां. नोकरे खातीर दिल्ली रक्कम जे बँकें वतीन हस्तांतरीत जाल्ली, त्या बँकेचे अधिकारी तशेंच हेर साक्षिदारांची साक्ष तशेंच खोलायेन चवकशी केले उपरांत पुलीस निरिक्षक राहूल परब हांच्या मार्गदर्शना खाला उपनिरिक्षक मयूर सावंत हांणी हें आरोपपत्र न्यायालयांत दाखल केलें.

मजगतीं, फाटल्या 23 ऑक्टोबर 2024 दिसा कागाळदार प्रिया अरविंद मणेरकार हिणें पर्वरी पुलिशेंत कागाळ केल्ली. सरकारी नोकरीचें हांयस दाखोवन दुबावीत पुजा नायक हिणें खूबशा जाणांक तोपी घाल्ल्याचो प्रकार उक्तडार आयिल्लो. हाचे आड म्हाड्डोळ पुलीस स्टेशनार गुन्यांव दाखल जाल्लो. ह्याच दुबावीत बायलेन आपली लेगीत फटवणूक केल्ली, हाची खात्री जाले उपरांत कागाळदार मणेरकार हिणें पुलिशेंत रितसर कागाळ नोंद केल्ली.

ते प्रमाण पुलिसांनी दुबावीत आरोपी पुजा उर्फ रुपा उर्फ श्रावणी नायक (रा. पोरणें गोंय), अजीत शशिकांत सतरकार आनी अनिशा अजीत सतरकार (रा. पिसगाळ, प्रियोळ) ह्या तिगां आड भारतीय दंड संहितेच्या 420 आनी 34 कलमा खाला गुन्यांव दाखल केल्लो.

20 नोव्हेंबर 2021 ते 12 डिसेंबर 2021 ह्या काळांत हो फटवणुकीचो प्रकार घडिल्लो. कागाळदार प्रिया मणेरकार हिका वयल्या दुबावितांनी सरकारी नोकरी मेळोवन दिवपाचें हांयस दाखयिल्लें. हे खातीर दुबावितांनी तिचे कडल्यान 4 लाख रुपया घेतिल्ले. ही रक्कम कागाळदारान दुबावीत आरोपी सतरकार हाच्या बँक खात्यांत जमा केल्ली.

दुबावीत आरोपी पुजा नायक हिका अशाच फटवणुकीच्या प्रकरणांत दिवचल पुलिसांनी फाटल्या 29 ऑक्टोबर 2024 दिसा अटक केल्ली. उपरांत न्यायालयान तिची रवानगी न्यायालयीन कोठयेंत केल्ली. थंय सावन हस्तांतरीत पद्दतीन पर्वरी पुलिसांनी ताब्यांत घेवन वयल्या प्रकरणांत पुजाक 6 नोव्हेंबर 2024 दिसा रितसर अटक केल्ली.