भांगरभूंय | प्रतिनिधी
नोकरेचें हांयस दाखोवन 13 जाणांक 27.73 लाखांक घातिल्ली तोपी
पणजीः न्युझिलॅण्डांत नोकरी दिवपाचें हांयस दाखोवन गोंयांतल्या 13 जाणांक 27.73 लाख रुपयांक तोपी घातल्या. ह्या प्रकरणांत गुन्यांव फांट्यान म्हापशेंची कांतीच्या दुयेंसाची तज्ञ डॉ. मिना गोप हिका अटक केल्या.
गुन्यांव फांट्यान दिल्ले म्हायती प्रमाण, ह्या प्रकरणांत गिरी- बार्देसची संजना बिचोलकार हांणी कागाळ दाखल केल्या. ते प्रमाण, दुबावीत डॉ. मिना गोप आनी तिचो भाव अरविंद गोप हांणी कागाळदाराक न्युझिलॅण्डांत नोकरी दिवपाचें हांयस दाखयलें. तशेंच कागाळदारा कडल्यान दुबावितांनी सप्टेंबर 2020 सावन विवीध तरांचें शुल्क म्हूण 8.5 लाख रुपया घेतले. हे संबंदांत दुबावितांनी व्हिसा संबंदीत बनावट दस्तावेज तयार करून दिले. मात अजून तिका विदेशांत नोकरी दिवंक ना, तशेंच पयशे लेगीत परतून दिवंक ना, अशी म्हायती कागाळेंत नमूद केल्या. हेच मजगतीं, वयल्या दुबावितांनी आनीक 12 जाणांक वट्ट 27 लाख 73 हजार 540 रुपयांत तोपी घातिल्ल्याचें मुकार आयलें. ते प्रमाण, त्या 12 जाणांनी गुन्यांव फांट्यात कागाळ केल्या.
ह्या प्रकरणांत गुन्यांव फांट्याचे पुलीस अधिक्षक राहूल गुप्ता आनी उपअधिक्षक राजेश कुमार हांच्या मार्गदर्शना खाला निरिक्षक प्रशल नायक देसाय हांणी भारतीय न्याय संहितेच्या कलन 318, 336, 336 आरडब्ल्यू 3 (5) आनी इमिग्रेशन कायद्याच्या कलम 10 खाला गुन्यांव दाखल केला. ते परांत ह्या प्रकरणांत गुन्यांव फांट्यान दुबावीत म्हापशेंची कांतीच्या दुयेंसाची तज्ञ डॉ. मिना गोप हिका अटक केली जाल्यार तिचो भाव अरविंद गोप विदेशांत आशिल्ल्याची म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
