भांगरभूंय | प्रतिनिधी
राज्यसभा खासदार सदानंद शेट तानावडे हांच्या प्रस्नाक लेखी जाप
पणजीः खेलो इंडीया हे केंद्राचे येवजणे खाला गोंयांत एक खेळां सुविधा तयार जाल्या. हाचे वरवीं ४ खेलो इंडीयाच्यो संस्था ६७ खेळगड्यांक प्रशिक्षण दितात. आतां मेरेन ६ खेलो इंडीया खेळगडे राज्यांत तयार जाल्यात, अशी म्हायती केंद्रीय खेळां मंत्रालयान दिल्या.
खेलो इंडीया येवजणे खाला गोंयांत कसली सुविधा हातांत घेतल्या आनी भारतीय खेळां प्राधिकरणाच्या खेळां प्रशिक्षणा विशीं खासदार सदानंद शेट तानावडे हांचे प्रस्न राज्यसभेच्या पटलार लेखी जापेंत केंद्रीय खेळां मंत्री मनसुख मांडवीया हांणी ही म्हायती दिल्या.
खेलो इंडीया येवजणे खाला एक खेळां सुविधा मंजुर जाल्या. तशेंच राज्यांत दोन खेलो इंडीया केंद्र, १ खेलो इंडीया उत्कृश्ठाय केंद्र आनी १ खेलो इंडीया मान्यताय प्राप्त अकादमी आसा. खेलो इंडीया उत्कृश्ठाय केंद्रांत पेवप, बॅडमिंटन आनी टेबल टेनीस ह्या खेळांत ६७ खेळगड्यांक प्रशिक्षण दितात. गोंयान १७ अस्मिताय सर्तीच्यो येजमानकी केल्यात आनी तातूंत २०० बायलां खेळगड्यांनी वाटो घेतला.
खेलो इंडीया येवजणेच्यो खेळां सर्ती आनी प्रतिभा उदरगत घटकां सकयल गोंयांत प्रतिभावंत खेळगड्यांची खेलो इंडीया खेळगडे म्हण निवड जाल्या. खेलो इंडीया खेळ आनी राष्ट्रीय सर्तींत केल्ली देखदीणी कामगीरी पळोवन तशेंच संबंदीत राष्ट्रीय खेळां फेडरेशन आनी शालेय खेळां फेडरशनाचे उक्ते आनी पारदर्शक निवड चाचणी पध्दती वरवीं ह्या खेळगड्यांची निवड जाता.
ते भायर हे येवजणेच्या खेलो इंडीया केंद्र आनी खेळां अकादमी ह्या घटका खाला निवड केल्ल्या प्रतिभावंत खेळगड्यांक खेलो इंडीया अकादमींत वाटेकार जावपाक एक संद दितात तशेंच दर खेळगड्यांक रु. ६.२८ वर्सुकी अर्थीक मजत दितात. हातूंत प्रशिक्षण खर्च, प्रशिक्षण, सर्तीत अणभव दिवप, शिक्षण, उपकरण आनी वैज्ञानीक मजतीचो आस्पाव आसा. आतां मेरेन ६ खेलो इंडीया खेळगड्यांची निवड गोंय राज्यांत जाल्या.
१९८७ सावन दोन भारतीय खेळां प्राधिकरणांचीं दोन ट्रेनींग केंद्रां आसात. तातूंत तायकवोंडो हो खेळ फोंडें केंद्रांत २०१९-२०२० मेरेन चलतालो. मात खेळगड्यांचो आंकडो उणो आशिल्ल्यान आनी असलीं आनीकूय केंद्रां लागींच आशिल्ल्यान वर्स २०२०-२१सात तायकवांडो हो खेळ बंद केलो.
भारतीय खेळां प्राधिकरणाचें फोंडें केंद्रांत ज्युडो जाल्यार पेडें केंद्रांत बॉक्सींग आनी जुडोचें प्रशिक्षण दितात. खेलो इंडीयाचीं दोन क्रेंद्रां आसात, तातुंतलें पेडें खेळां संकुल म्हापश्यां हॉकी जाल्यार पंडीत जवाहरलाल नेहरू फातोड्डें स्टेडीयमांत फुटबॉलाचें प्रशिक्षण दितात. जाल्यार कांपाल खेळां प्राधिकरणाच्या खेळ संकुलांत खेलो इंडीया उत्कृश्ठताय केंद्रांत बेडमिंटन, पेवप आनी टेबल टेनीसचें प्रशिक्षण दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
