भांगरभूंय | प्रतिनिधी
नवी दिल्ली, खबरां संस्था ः फाटल्या पांच वर्सांत पयलेच खेपे आरबीआयन (रिझर्व्ह बँक ऑफ इंडिया) रेपो रेट देंवोवपाचो निर्णय घेतला. रिझर्व्ह बँकेन हाचे आदींची व्याजदर कपात मे 2020 वर्सा केल्ली. फाटल्या दोन वर्सांत रिझर्व्ह बँकेन व्याजदरांत कसलोच बदल करूंक ना. आतां मात आरबीआयन व्याजदर देंवोवपाचो निर्णय जाहीर केल्ल्यान शेअर बाजारांत तशेंच भारतीय बाजारपेठेचेर ताचो कितें परिणाम जावं येता हें विशीं अर्थशास्त्रज्ञां मदीं चर्चा सुरु जाल्या.
रिझर्व्ह बँकेच्या स वांगड्यांच्या मोनेटरी पॉलिसी कमिटी म्हळ्यार सीपीसीच्या शुक्रारा जाल्ले बसकेंत हो निर्णय घेतलो. ते प्रमाण रिझर्व्ह बँकेन व्याजदरांत 25 बेसिस पॉयंटांनी कपात केल्या. देखून आतां व्याजदर 6.50 टक्क्यांवयल्यान 6.25 टक्क्यां मेरेन देंवला. केंद्र सरकारान अंदूंच्या अर्थसंकल्पांत 12 लाख रुपया मेरेन कर मुक्त करपाचे जाहीर केले उपरांत एका सप्तकां भितर आरबीआयन व्याजदर कपात करपाचो निर्णय जाहीर केला. देखून फुडल्या काळांत घर आनी वाहन रीण सवाय जावपाची शक्यताय आसा.
देशाचो अर्थीक विकासदर 6.7 टक्के
मजगतीं, आरबीआयचे एमपीसी बसकेंत जाल्ले चर्चे उपरांत देशाची अर्थीक विकासवाड 6.7 टक्के इतली आसूं येता असो अदमास काडला. ते भायर घाऊक बाजारांतलो म्हारगायेचो दर सुमार 4.2 टक्क्याच्या लागसार उरतलो अशें गव्हर्नर संजय मल्होत्रा हांणी जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
